Треба да се држиме до она што е најважно, до Копенхагенските критериуми и најпрво она што е основен тест за сите – владеењето на правото. Се укажа на пакетот закони изработени од Министерството за правда, што се однесуваат на Јавното обвинителство, на Судскиот совет, на платите на јавните обвинители и на членовите на Судскиот совет, изјави денеска претседателката Гордана Силјановска – Давкова за состојбата со евроинтеграцијата по втората седница на Советот за безбедност и нагласи дека основниот заклучок е дека имаме Реформска агенда и имаме План за развој.
Таа информира дека се дискутирало и за Законот за соодветна и правична застапеност.
– Тенденција на Министерството за правда е да ги праќа законите на мислење на Венецијанската комисија, што не го правевме често во претходниот период. Зошто е тоа важно? Да потсетам, според изменетата методологија не е услов само хармонизацијата на нашата легислатива со европската, туку и ефективното спроведување на законите и мислењата на Венецијанската комисија и на ГРЕКО – истакна претседателката.
Сите дискутанти, како што рече, укажаа на очекувањата и важноста од извештајот во ноември, што го добиваме за напредокот во евроинтеграцциите.
– Јас и други укажавме на потребата од активност на Националниот совет за евроинтеграции во Собранието бидејќи во него членуваат не само пратеници, туку и претставник на МАНУ, претставник на невладините организации… Тоа е многу важно. Зошто? За да градимие ние единство и да се разбираме и да доаѓаат критиката и предлозите на време за да може навистина легислативата да биде по европска мерка оти постфестум е доцна. Истото важи и за Комисијата за европски прашања, која треба да биде многу поактивна или активна за да може да ги анлизираме состојбите и за да може да одговориме на забелешките што ги дава ЕК за напредокот на државата во сите области – рече Силјановска – Давкова.
