Шведската компанија „СвеГрин“ гради т.н. фарми во супермаркетите како еколошкo решение за одгледување овошје и зеленчук. Решението од „СвеГрин“, кое веќе постои во Шведска и Германија, е начин да се одговори на недостигот од вода и земјоделско земјиште и зависноста од глобалната геополитика. Одгледувањето зеленчук на локално ниво, исто така, ќе ги намали емисиите во сообраќајот, ќе го продолжи нивниот рок на траење и ќе им го подобри вкусот на производите. Ова комерцијално растечко решение користи хидропоничен метод. Секоја платформа за одгледување може да одгледува еднакво количество храна за најмногу три хектари земјоделско земјиште. Клиентите можат да гледаат како растат и да си наберат од зеленчуците во самата продавница.
– Супермаркетите, на пример, имаат пекарници од каде што може да се купи свежо печиво. Но сега тие почнуваат и да ја одгледуваат храната наместо само да ја приготвуваат или продаваат – вели главниот директор за иновации и домаќин на „СвеГрин“, Сепехр Мусави.
Во моментов, се одгледуваат до 100 различни видови култури, вклучувајќи зелена салата, копар, нане и магдонос.
– Ние додаваме микрозелени производи во нашето портфолио, тестираме овошја, а ги разгледуваме и јагодите како опција. Некои потрошувачки трендови лесно се забележуваат. За време на летните фестивали, единственото нешто што го продавате во Шведска е копарот. А потоа за време на летните фестивали имаме нане, на пример – додава Сепехр.
Сепак, времето на раст на растенијата, годишните времиња и преференциите на потрошувачите, претставуваат предизвик, па компанијата се сврте кон вештачката интелигенција, која ќе помогне во процесот на донесување одлуки.
– Ова е еден од случаите на користење вештачка интелигенција во земјоделството. Имаме алатка за вештачка интелигенција што им дава рецепт за раст на нашите одгледувачи, така што луѓето што работат во супермаркетот ќе добијат список со задачи, кој ќе гарантира дека ги имаат токму производите што им се потребни за тој ден – вели Сепер.
Супермаркетите не се единствените што бараат еколошки решенија на локално ниво – рестораните, хотелите, универзитетите и сопствениците на недвижности, исто така, сакаат да се приклучат. Компанијата беше наградена и номинирана неколкупати за одржливото производство на храна.
