Лидерот на Демократско движење, партијата, која е дел од коалицијата „Вреди“, Изет Меџити истакна дека тројца-четворица од вкупно 18 пратеници колку што доби мандати „Европскиот фронт“ на парламентарните избори, носат одлука да преминат во новото мнозинство.
Меџити во интервју за телевизијата „А2 Си-ен-ен“ во Албанија не сакаше да открива имиња, но рече дека во моментов од две турски партии кои се дел од коалицијата со ДУИ, нема да можат да останат четири години во опозиција.
– Можам да кажам дека од тие 18 пратеници што ги доби „Европски фронт“, тројца-четворица со едната нога се дел од новото мнозинство. Сега нема да ги кажам нивните имиња, но таму има две турски партии, а турската заедница нема капацитет и потенцијал да остане четири години во опозиција. Тие секако дека се гледаат себе си во идната влада. Има и некои други пратеници кои се со Ахмети, кои во минатото се тепале и се убивале меѓу себе, предизвикувале жртви кај Албанците и тешки последици. Заедно се засега, беа здружени за да опстанат. Но, мисијата на „Европски фронт“ е пропадната – рече Меџити.
Новите пратеници од „Европскиот фронт“ Сали Мурати и Бејџан Иљаз од Движењето на Турците и Демократската партија на Турците за неколку медиуми демантираат дека тие ќе сменат страна. Велат дека и понатаму ќе делуваат како пратеници кои се дел од „Европскиот фронт“, а забележуваат дека коалицијтаа „Вреди“ ги игнорирала другите етнички заедници и ги дели гласовите на етничка основа.
