Недостигот на време е една од најголемите пречки за редовните превентивни прегледи кај жените, покажува интерна анкета спроведена во пет компании од модната индустрија. Резултатите беа претставени во рамки на иницијативата „X FASHION PINK OCTOBER 2026“, која се одржа во „N99“ во Скопје, со цел да се поттикнат здравствената едукација, превенцијата и раното откривање на ракот на дојка.
Под мотото „Во мода е да се грижиш за себе“, компаниите МИКА, X FASHION, NEXT GEN, МИКЕЛ и ИГАЛ ФЕШН ги здружија своите активности и влијание за да испратат порака дека грижата за здравјето на жените треба да биде дел од секојдневните навики, но и од корпоративната култура.
Една од организаторките и иницијаторките на настанот, м-р Елена Малинова Стојанова, во своето обраќање ја истакна важноста жените, покрај обврските кон работата, семејството и луѓето околу себе, да одвојат време и за сопственото здравје.
– Храброст е и да застанеш, да се погледнеш себеси и да кажеш: И јас сум важна – беше една од клучните пораки на нејзиното обраќање.
Таа посочи дека грижата за вработените не треба да се сведува само на професионалните резултати и квалитетот на работата, туку подразбира и создавање работна средина во која се поддржуваат здравјето и благосостојбата на луѓето.
Медицински експертки одговараа на прашања за превенцијата
Едукативниот дел од настанот беше посветен на разговор со медицински експертки за прашања поврзани со здравјето на дојките. Д-р Маја Стојановиќ-Чрчева, специјалист по радиодијагностика, и д-р Марина Илјовска, специјалист онколог, одговараа на прашања за превентивните прегледи, дијагностиката, факторите на ризик, лекувањето и дилемите со кои жените често се соочуваат.
Дел од организацискиот тим беше и проф. д-р Александра Србиновска-Дончевски, професорка и консултантка за корпоративни комуникации и организациски развој, која ја модерираше едукативната дискусија.
Преку внимателно избрани прашања и отворен разговор, дискусијата имаше цел да ги приближи медицинските информации до присутните, но и да поттикне поголема подготвеност за разговор за темите поврзани со превенцијата и раното откривање на болеста.
Анкетата открива разлика меѓу свесноста и практиката
Дополнителна перспектива за навиките и ставовите поврзани со превенцијата даде интерната анкета спроведена во рамки на компаниите. Резултатите укажуваат на разлика меѓу познавањето на ризикот од рак на дојка и практичното спроведување на превентивните прегледи.
Според анкетата, 84,3 проценти од испитаниците се запознаени со ризикот од рак на дојка во текот на животот, но 47 проценти изјавиле дека никогаш не направиле мамографија или ултразвучен преглед на дојките. Само 21,6 проценти навеле дека редовно ги прават овие прегледи.
Како најголема пречка за редовните прегледи се издвоил недостигот на време, кој го посочиле 61,9 проценти од испитаниците.
Анкетата покажува и дека 57,5 проценти сметаат оти е исклучително важно работното место да покажува грижа за здравјето на жените, додека 91,1 проценти ја поддржуваат иницијативата за подигнување на свеста и рано откривање на ракот на дојка.
Од компаниите посочуваат дека резултатите се однесуваат исклучиво на интерната анкета и не претставуваат репрезентативен примерок за целото население. Сепак, тие укажуваат на потребата информациите за здравствените ризици да се преточат во конкретни постапки, соодветни превентивни прегледи и навремено барање стручна медицинска помош.
Заедничка одговорност за здравјето на жените
Со иницијативата „X FASHION PINK OCTOBER 2026“, петте компании испратија порака дека грижата за здравјето на жените не е само лична обврска, туку и прашање на поширока општествена одговорност.
Преку едукација, поддршка и отворање простор за разговор, деловната заедница може да придонесе за поголема здравствена свесност и развивање култура во која превенцијата има значајно место.
Пораката на настанот останува едноставна, но важна: „Во мода е да се грижиш за себе.“
