НОВИ ТЕХНОЛОГИИ
Белгиски научници обучија модел на вештачка интелигенција за да предвидат дали луѓето ќе сакаат одредено пиво и како да го подобрат рецептот Тим научници од Универзитетот во Белгија велат дека вештачката интелигенција може да помогне да се предвиди дали на потрошувачите ќе им се допадне одреден тип на пиво, дури и пред да го пробаат.
Истражувачите собраа експертска група за дегустација од 16 луѓе и побараа од нив да вкусат 250 комерцијални пива од 22 различни стила, како што се лагери, светли пива и темни пива. Учесниците ги оценија пијалаците според 50 карактеристики, вклучувајќи различни вкусови на хмељ, слад и квасец, невкусни вкусови и зачини.
Експертите обучија модел со вештачка интелигенција
Истражувачите потоа собраа 180.000 јавни прегледи на истите пива на „Рејт биер“ – онлајн платформа за оценување на потрошувачите, за да ги дополнат податоците од панелот. Пивата исто така беа внимателно анализирани за нивниот состав. За секое пиво научниците измериле 226 различни хемиски својства, вклучувајќи содржина на алкохол, пХ и концентрација на шеќер и повеќе од 200 ароматични соединенија.
Истражувачите ги користеле овие големи збирки на податоци „за да развијат предвидливи модели што ги поврзуваат хемиските податоци со сетилните карактеристики“, објаснува студијата. Тие ги објавија своите наоди во списанието „Нејчр комуникејшнс“.
Експертите обучија модел со вештачка интелигенција за да го предвидат вкусот на пивото и дали тоа би го сакале луѓето врз основа на неговиот хемиски состав. Со овие податоци, научниците успеаја да го подобрат вкусот на постојното комерцијално белгиско пиво со додавање одредени ароми предвидени од моделот, со цел да се зголеми неговиот квалитет. Модифицираното пиво постигна подобри резултати од оригиналното при слепите дегустации.
– Откриено е дека некои пива значително ги подобруваат вкупните оцени меѓу обучените панелисти – заклучија истражувачите, при што панелистите забележаа „зголемен интензитет на вкус на естер, сладост, алкохол и ситост“.
ВИ како дегустатор
Дегустаторите исто така подобро го оценија подобрениот примерок од безалкохолно пиво. Студијата истакнува дека предвидувањето на вкусот и вреднувањето на храната врз основа на нивните хемиски својства остануваат комплицирани. Една од главните пречки е големиот број хемиски супстанции што меѓусебно си одговараат и влијаат на вкусот.
– Перцепцијата на вкусот е многу сложена, таа е резултат на интеракцијата на стотици различни молекули на физичко-хемиско и сетилно ниво – велат авторите.
Истражувачите забележуваат и дека човечките вкусови се условени од други фактори, како што се генетиката, околината, културата и психологијата на потрошувачите.
Поради тоа тие користеа многу големи збирки на податоци што може да се анализираат само со модели за машинско учење.
– Вкусот на пивото е сложена мешавина на ароми. Невозможно е да се предвиди колку е добро пивото само со мерење едно или неколку соединенија. Навистина ни треба компјутерска моќ – рече во изјавата Мишиел Шреурс, водечки автор на студијата.
Тимот рече дека наодите од студијата може да се прошират и на други прехранбени производи, што би можело да го промени начинот на кој се прави нова храна.
– Нашата најголема цел во моментов е да направиме подобро пиво без алкохол. Користејќи го нашиот модел, веќе успеавме да создадеме коктел од природни ароматични соединенија што ги имитираат вкусот и мирисот на алкохолот без ризик од мамурлак – изјави професорот Кевин Верстрепен.
