Зголемувањето на извозот, на 4,1 милиони возила минатата година, би можело да ја стави Кина пред Јапонија како број еден светски извозник на автомобили
Економија: Производство и трговија со патнички моторни возила
Кинескиот извоз на автомобили се зголеми за 63,7 отсто во 2023 година, додека домашната продажба, поттикната од владините субвенции, се зголеми за 4,2 отсто на крајот на годината, соопшти Кинеската асоцијација на производители на автомобили.
Зголемувањето на извозот, на 4,1 милиони возила, би можело да ја постави Кина над Јапонија како број еден извозник на автомобили во светот.
Кинеските производители на автомобили силно го зголемија извозот поради потребата од раст, а исто така драматично ги зголемија инвестициите во електрични возила, додека владините субвенции ја трансформираа Кина во најголемиот светски пазар за електрични возила, иако вкупната продажба на автомобили стагнира.
Бумот на продажбата на рускиот пазар помогна да се зголеми кинескиот извоз во 2023 година, бидејќи европските и јапонските производители се повлекоа поради војната во Украина.
Кинеската асоцијација за патнички автомобили соопшти претходно дека побарувачката во Русија и соседните земји забавува и дека идниот раст на извозот ќе зависи од проширувањето на продажбата на електрични возила во странство, како што се пазарите во Југоисточна Азија, Европа и Австралија.
Здружението на производители не дава податоци за продажбата на електрични возила, но податоците објавени од Здружението за патнички автомобили покажаа дека електричните возила учествуваа со 24 отсто од продажбата на нови автомобили во Кина во 2023 година, наспроти 12 отсто во 2021 година.
Агенцијата „Фич рејтингс“ во извештајот минатиот месец наведе дека очекува уделот на возила со нови типови на погони, вклучувајќи и хибриди, во вкупната продажба во Кина да се зголеми на 42-45 проценти во 2024 година, а исто така предвидува дека извозот ќе се зголеми за 20-30 проценти годинава.
Кинеската асоцијација на производители соопшти дека вкупната продажба на сите возила, дома и во странство, вклучувајќи камиони и автобуси, ќе достигне пресвртница од 30 милиони единици во 2023 година, што е за 12 отсто повеќе од претходната година.
