Животни
Норвешкиот лундехунд потекнува од карпестиот остров Вероја во Норвешка. Оваа уникатна раса е единствената создадена за лов на морски папагали, птици чиј лов денес е забранет. На прв поглед изгледа како типично северно куче слично на шпиц, со триаголни уши, заоблена опашка и дебело крзно. Меѓутоа, одблизу открива неколку уникатни карактеристики за кои пишува Американскиот кинолошки клуб.
Оваа раса има шепи со шест целосно функционални прсти што го олеснуваат качувањето по карпите. Неговиот врат и зглобовите се исклучително флексибилни за да може да се протне низ тесните тунели. Иако речиси сите кучиња можат да ги мрдаат ушите, норвешкиот лундехунд може целосно да го затвори ушниот канал за да го заштити од вода и нечистотија.
Ова е генерално здрава раса, а одговорните одгледувачи ги тестираат своите кучиња за нарушувања на очите и проблеми со колената. Потребно е редовно да ги мие забите со паста наменета за кучиња. Редовните посети на ветеринар за преглед и контрола на паразити помагаат да се обезбеди долг и здрав живот за кучето, а неговиот животен век е помеѓу 12 и 14 години.
Што се однесува до одржувањето на крзното, овој норвешки ловец на птици има горен слој на крзно и подвлакна што не се тешки за одржување. Нему му треба неделно четкање за да се ослободи од нечистотијата и отпаднатите влакна.
Ова е исклучително активно куче и има средно до високо ниво на енергија. Најсреќен е кога има можност секој ден да учествува во некоја форма на физичка активност. Ова е многу чувствителна раса и може да развие проблеми со довербата, поради што треба да се избегнуваат строги методи на дресура. Се препорачуваат курсеви за рана социјализација за да се осигури дека кучето ќе порасне во добро приспособено и добро обучено милениче. Расата е исклучително интелигентна и паметна, а во исто време нежна и весела.
Исхраната на ова куче треба да се состои од квалитетна храна за кучиња, или комерцијално произведена или подготвена дома со одобрение од вашиот ветеринар. Исхраната треба да одговара на возраста на кучето. Некои кучиња имаат тенденција да добиваат тежина, па затоа е неопходно да се внимава на внесувањето калории.
