Светот е сцена
Уметникот Дејмиен Хирст повторно е во неволја со активистите за правата на животните поради свое дело. Неговата инсталација „Сто години“ беше отстранета од германски музеј откако уметникот беше цел на нападите на организацијата за заштита на животните ПЕТА.
Делото, всушност, е преполовена стаклена коцка во која од едната страна може да се види шрафирањето на мувите, кои потоа патуваат низ дупката за конечно да стигнат до вештачката светлина што ги убива. Ветеринарната канцеларија на градот, исто така, поднесе официјална жалба до Уметничкиот музеј на Волфсбург. Делото е дел од големата групна изложба, која ја доведува во прашање улогата на вештачкото осветлување во уметноста, наречена „Моќ! Светлина!“
Андреас Бејтин, директор на музејот и наедно куратор на изложбата, изјави дека не мисли дека и мувите се предмет на законите за заштита на животните, додавајќи дека целта на работата е да се укаже на фактот дека инсектите умираат масовно од јавното осветлување.
ПЕТА соопшти дека „убивањето животни нема никаква врска со уметноста“ и дека тоа само „ја покажува ароганцијата на луѓето што не избираат средства за остварување на сопствените интереси“.
Делото „Сто години“ за првпат беше изложено во Лондон во 1990 година, заедно со едно од најпознатите дела на Хирст, „Илјада години“. Последново е уште побрутално дело во кое е прикажана отсечена крвава глава околу која се собираат муви. Хирст вообичаено е окупиран со темата на смртта во неговата уметност и ова не е првпат да биде цел на активистите.
Во 2017 година, новинарката Каролин Голдстејн, која пишува за „Артнет њуз“, се обиде да изброи колку мртви суштества дотогаш користел Хирст за својата уметност, а одговорот беше близу милион, а огромното мнозинство го сочинуваа инсекти и пеперутки. Музејот што го отстрани делото рече дека ќе стапи во контакт со уметникот и ќе се обиде да го убеди да направи замена со вештачки муви.
