Со намалувањето на употребата на климатизерите, Владата има цел да заштеди четири милијарди кубни метри гас оваа година
Италијанската влада најде начин како да штеди енергија
Италијанската влада ќе настојува да се намали употребата на климатизацијата во јавните згради ова лето, бидејќи се обидува да ја намали зависноста од рускиот гас. Според новите правила, наречени „Операција термостат“ од италијанските медиуми, климатизацијата во јавните згради, вклучувајќи ги училиштата и владините министерства, не може да се постави пониска од 27 степени Целзиусови. Во зима, системите за греење не смеат да ги загреваат зградите над 19 степени, иако ќе бидат дозволени два степени на слобода. Претходно, јавните згради можеа да се ладат до 26 степени. Оние што нема да ги почитуваат може да бидат казнети со казни од 500 до 3.000 евра.
Мерките беа усвоени како амандман во парламентот неодамна, по зголемувањето на цените на енергијата и додека Владата се обидува да го диверзифицира увозот на гас во Италија, бидејќи таа увезува околу 40 отсто од својот гас од Русија. Москва веќе го прекина снабдувањето со гас за две членки на Европската Унија, Полска и Бугарија, што ги зголеми стравувањата за иднината на снабдувањето со енергија. Во текстот на амандманот, изнесен од пратениците Ангела Маси и Давиде Крипа од „Движењето пет ѕвезди“, се вели дека целта е „да се намали топлинската потрошувачка на зградите и да се добијат непосредни годишни заштеди на енергија“.
Со намалувањето на употребата на климатизерите, Владата има цел да заштеди четири милијарди кубни метри гас оваа година. Мерките стапуваат во сила на 1 мај и ќе траат до април 2023 година. Премиерот Марио Драги ги обвини европските набавки на руска енергија по надуени цени за финансирање на воената операција на Украина и предупреди дека построгото однесување кон Русија може да значи носење тешки животни одлуки во начинот на живеење. Потребите на Италија за гас се покриени до октомври, дури и ако Москва ги затвори вентилите.
