Непал има толкав недостиг од боци за кислород што денес ги замоли алпинистите што се качуваат на Монт Еверест да ги донесат своите празни боци наместо да ги оставаат на планината, во време кога Непал се бори со вториот бран од пандемијата на ковид-19.
Државата им даде дозвола на повеќе од 700 алпинисти да се искачат на 16 врва на Хималаите, од кои 408 на Монт Еверест, за периодот од април до мај, со цел да почне планинарската индустрија и туризмот да се постави на нозе, пренесува „Ројтерс“.
Непалското планинарско здружение (НМА) побара од планинарите да му помогнат на Непал да се справи со зголемениот број заболени од ковид-19, што го доведе здравствениот систем на работ на колапс.
Шефот на НМА рече дека алпинистите и нивните водичи со себе однеле најмалку 3.500 боци кислород, кои главно остануваат закопани во лавина или се оставаат на падините за време на спуштањето низ планината.
– Апелираме до планинарите и шерпасите да враќаат празни боци секогаш кога можат за да можеме да ги наполниме и да ги користиме за лекување пациенти со коронавирус – изјавија од НМА за „Ројтерс“.
Многу приватни и државни болници во Катманду тврдат дека не може да примат повеќе пациенти поради недостиг на кислород и боци.
„Потребни ни се околу 25.000 боци што е можно побргу за да спасиме луѓе од смрт. Ова е итно“, изјави службеникот на Министерството за здравство, Самир Кумар Адихари.
