Стриминг-платформите за слушање музика „Спотифај“ и „Епл мјузик“, кои заедно контролираат речиси половина од целиот глобален музички стриминг, ги прогласија своите најемитувани песни на годината. Сервисот „Спотифај“, кој во првиот квартал од 2021 година сочинуваше 32 отсто од глобалниот пазар за стриминг-музика, и „Епл мјузик“, со 16 отсто удел на пазарот, ги објавија своите годишни листи на најемитувани песни во 2021 година.
Петте најемитувани песни на глобално ниво на „Спотифај“ изминатава година се „Drivers license“ на Оливија Родриго, „Montero (Call Me by Your Name)“ на раперот Лил Нас Екс, „Stay“ на Д Кид Ларои, заедно со Џастин Бибер, „Good 4 u“ на Оливија Родриго и „Levitating“ на Дуа Липа со раперот ДаБејби.
На листата на најемитувани песни на „Епл мјузик“ се наоѓаат „Dynamite“ на јужнокорејската група „БТС“, „Drivers license“ на Оливија Родриго, „Positions“ на Аријана Гранде, „For The Night“ на Поп Смоук заедно со Лил Бејби и ДаБејби и „Blinding Lights“ на Д Викенд.
