Кина може да воведе уште построги ограничувања за времето што децата можат да го поминат користејќи мобилни телефони.
Управата за сајбер-простор на Кина (CAC) предложи закон со кој ќе се ограничи употребата на мобилни телефони на максимум два часа дневно за деца под 18-годишна возраст. Ова се однесува на децата на возраст од 16 и 17 години, додека децата на возраст меѓу осум и 15 години би биле ограничени на еден час дневно. Исто така, децата помлади од осум години би можеле да користат мобилни телефони по 40 минути дневно.
Законот ќе ја забрани употребата на мобилни телефони помеѓу 22 и 6 часот, а мобилните телефони треба да имаат режим со лесен пристап за родителите за да можат да го ограничат она што децата го гледаат и да им дозволат на интернет-провајдерите да прикажуваат само содржини соодветни на возраста. Децата помлади од три години би биле ограничени на слушање песни и други аудиосодржини, додека оние на возраст од 12 и повеќе би можеле да гледаат едукативен материјал и вести. Ќе има исклучоци за регулирани образовни содржини и служби за итни случаи.
Целта на мерките е да се намали однесувањето на зависност кај децата. Кинеската влада е загрижена дека продолжената употреба на мобилни уреди, игри и услуги може да му наштети на развојот на децата. Земјата веќе ги ограничува младите на три часа онлајн видеоигра неделно.
Предлог-законот сѐ уште е отворен за јавна консултација и нема гаранции дека ќе биде усвоен. Се поставува и прашањето за имплементација, бидејќи не се знае дали производителите на хардвер ќе бидат одговорни за имплементација на режим за деца.
Новите правила би имале значаен ефект врз кинеските развивачи на апликации како што е „БајтДанс“, кој стои зад Тикток и кинескиот „Дујин“, но и „Тенсент“, кој е сопственик на „ВиЧет“ и многу игри. Можеби ќе треба да дизајнираат апликации и да ја приспособат содржината на гореспоменатите временски ограничувања.
