Филмот „М“ на Вардан Тозија ја доби наградата за најдобар филм на њујоршкото издание на фестивалот „Денсис вит филмс“.
– Воодушевен сум што ја примам наградата за најдобар филм на годинешното издание во Њујорк. Претставуваше голема чест и уникатно искуство да се биде дел од официјалната селекција на овој исклучителен фестивал, со креативни и бескомпромисни филмски автори, на настан што прерасна во двигател на американскиот и интернационален филмски дух – вели режисерот Вардан Тозија, кој во Њујорк лично ја прими наградата.
Филмот „М“ на овој фестивал ја имаше американската премиера. Според „УСА тудеј“, фестивалот се вбројува меѓу десетте најзначајни филмски настани на северноамериканскиот континент, а според „Си-ен-ен“ важи за лидер во позиционирањето свежи и нови таленти на филмската индустрија. „Индивајр“ го препознава како „нашироко признаен поради откривањето на иновативниот дух и талент во независната кинематографија“.
– Уникатно воден филм со динамичен емотивен импакт, „М“ е спектакуларно достигнување во меѓународната филмска соработка – се наведува во официјалното образложение на фестивалот.
Приказната на Тозија за осамено момче од шумата, кое наидува на низа предизвици и авантури, барајќи ја својата самовила, токму во официјалната селекција на овој фестивал ја претстави македонската кинематографија пред американската публика. По премиерата се одржаа дискусии меѓу режисерот и членови на индустријата, како и разговори со публиката. Светските права за дистрибуција на македонскиот филм ги поседува американската компанија „Уан ту три медиа“.
