Проектот „Испразнето гнездо“ на Марија Конеска ќе биде претставен вечерва од 19 ч. во Ликовната галерија на ЦК „Марко Цепенков“ во Прилеп, што е рефлективно уметничко истражување на влијанието на емиграцијата врз градот Прилеп, Македонија.
Проектот е поттикнат од специфичните политички и економски околности во Македонија кои доведоа до зголемено отселување. При тоа уметницата се фокусира на Прилеп, нејзиниот роден град, каде што емиграцијата е особено изразена.
Проектот има за цел да прикаже како заминувањето на луѓето го менува изгледот на градот.
-Бидејќи во моментот кога е почнат проектот нема официјални податоци за ова прашање, Конеска собрала податоци со посета на домови и разговори со жителите за емиграциските искуства на нивните семејства. Преку овие интеракции, таа го документирала изгледот на домовите, улиците, а понекогаш и на самите луѓе. Забележала распространетост на родители чии деца повеќе не живеат во областа, работодавци кои се борат да најдат работници, полупразни училници и напуштени куќи, на крајот наидувајќи и на целосно напуштени улици. Проектот отвора потресно прашање не само за емиграцијата, туку и за умирањето на еден град. Конеска го визуелизира тоа создавајќи инсталација на фотографии испечатени на пластика со ласерски исечени силуети поставени пред фотографиите за да се создаде 3Д ефект. Основата на секое парче е 29,7 x 42 cm, испечатенa во боја, додека силуетите се црно-бели – велат од ЦК „Марко Цепенков“.
Марија Конеска е визуелна уметница, родена прилепчанка, која живее и работи во Скопје. Дипломирала во 2008 година на Одделот за графика на Факултетот за ликовни уметности при УКИМ во Скопје и магистерски студии по сликарство ги завршила на истиот факултет во 2016 година. Креативниот процес на Конеска може да се опише како визуелна трансформација на секојдневните искуства. Таа користи различни техники и материјали, вклучувајќи слики, цртежи, фотографии и колажи. Нејзините проекти често вклучуваат интеракции со други, собирање слики и приказни за да се подигне свеста за секојдневните животни прашања. Конеска има реализирано повеќе самостојни и групни изложби во земјата и во странство, а долги години работи како графички уметник во филмската продукција.
Ка.М.
