Техно
Тим истражувачи од Универзитетот „Мејнут“ во Ирска создадоа, според нив, прв ДНК-молекуларен компјутер, кој користи ДНК-нишки за извршување сложени математички операции без електрична енергија. Системот, наречен СДЦ, е еден од најсложените и најбрзи молекуларни компјутери досега, а истражувачите веруваат дека отвора нови можности за долгорочно складирање податоци, енергетски ефикасно пресметување и, на крајот, молекуларни системи што би можеле да функционираат во клетките за апликации како што е откривање болести. СДЦ успешно изврши десет молекуларни програми, вклучувајќи сложени 100-битни пресметки.
Истражувачите го дизајнирале компјутерот користејќи техника позната како ДНК-оригами: користејќи специјализиран софтвер, тие дизајнирале долга примарна нишка на ДНК и стотици пократки, специјално синтетизирани „клипови“ или помошни нишки. Потоа ги додале физичките нишки на ДНК во епрувета што содржела капка вода и сол. Кога смесата прво се загревала, а потоа се ладела, синџирите се организирале во високоуредена микроскопска компјутерска мрежа. Долгиот синџир служел како еден вид структурно скеле на кое бил организиран целиот систем. Таквиот пристап им овозможил на истражувачите да ги користат молекулите на ДНК не само како резервоар на биолошки информации туку и како физичка структура што учествува во извршувањето на компјутерските операции.
Успешното обработување на 100-битна пресметка покажа дека компјутерот може да обработува сложени податоци без грешки – бидејќи системот е ограничен од законите на физиката, потребата од софтвер за корекција на грешки е отстранета. Поважно е што самата пресметка не бара никаква електрична енергија бидејќи работи врз основа на хемиски реакции. Ова би можело да има голем потенцијал за компјутерите во иднина, особено во Ирска, бидејќи центрите за податоци трошеле 23 проценти од вкупната електрична енергија во земјата во 2025 година.
