САД предложија резолуција на Советот за безбедност на ОН со која се изразува поддршка за привремен прекин на огнот во Газа што е можно поскоро, пренесe „Бета“.
Во американската нацрт-резолуција, исто така, се наведува дека „во сегашните услови, голема копнена офанзива во Рафа ќе доведе до дополнително повредување на цивили и нивно дополнително раселување, вклучително и потенцијално во соседните земји“.
САД во текот на викендот соопштија дека ќе стават вето на резолуцијата предложена од Алжир.
– Постојано им ја изразивме оваа загриженост на нашите колеги во Советот. Поради оваа причина, САД не поддржуваат акција за таа нацрт-резолуција. Ако гласањето се земе како што е во нацртот, нема да биде усвоено – рече американската амбасадорката во ОН Линда Томас-Гринфилд.
ДПА претходно јави дека и покрај противењето на американската влада, Советот за безбедност на ОН сè уште планира утре да одржи гласање за прекин на огнот во Газа.
Нацрт-резолуцијата поднесена од Алжир и други ќе биде ставена на гласање во 10.30 часот по локално време во седиштето на ОН во Њујорк.
