Данска, Финска и Норвешка се здружуваат со шведските полицајци за да спречат префрлање на насилниот и брутален криминал на бандите од Шведска во нивните земји откако беа забележани повеќе такви случаи
ПОЛИЦИСКА СОРАБОТКА НА СЕВЕРОТ НА ЕВРОПА
Нордиските земји ќе ја зголемат полициската соработка и ќе формираат центар во Стокхолм, во обид да спречат ширење на сериозниот проблем со криминалот со банди во Шведска, Норвешка, Финска и Данска, соопшти во средата шведската влада.
Шведските банди долго време беа меѓу најнасилните во Европа, но годинава десет Швеѓани – над половина од нив малолетни – беа обвинети во Данска за обид за убиство или поседување оружје, што предизвика тревога и остри критики во Данска.
Шведскиот министер за правда Гунар Стромер изјави за „Ројтерс“ дека како одговор на тоа, Шведска и Данска ќе испраќаат полицајци меѓусебно.
– Важна причина за ова е да можеме да споделуваме информации меѓу нашите земји во реално време за да можат во порана фаза да идентификуваат кои деца и млади луѓе се изложени на ризик да бидат вовлечени во овие криминални мрежи и да го спречат тоа – рече Стромер.
Дополнително, во Стокхолм ќе биде формиран нордиски центар на полицајци од Финска, Норвешка и Данска. Норвешките и финските офицери се веќе таму, а Данците ќе се приклучат за неколку недели.
„ДЕЦА ВОЈНИЦИ“ И ЛОША ИНТЕГРАЦИЈА НА ИМИГРАНТИТЕ
Членови на шведски банди биле ангажирани од дански банди за насилни напади врз ривали, а данскиот министер за правда Питер Хумелгард рече дека имало 25 такви случаи само од април.
Тој ги означи како „деца војници“ и рече дека Шведска има „болна“ култура на насилство, која не ја сакаат во Данска. Затоа се обратив до мојот пријател што живее овде.
– Реалноста во моментов е дека не само Данска туку и големи делови од Нордијците ги чувствуваат последиците од долготрајните неуспешни имиграциски и правни политики во Шведска, а ние го сфаќаме тоа крајно сериозно – рече Хумелгард на прес-конференција во средата.
Стромер рече дека Данска исто така носи одредена одговорност за своите банди, но се согласува со голем дел од критиките во врска со проблемот со бандите на Шведска. Шведска неколку децении имаше некои од најдарежливите имиграциски политики во западниот свет, но значително ги заостри во последниве години, по наглиот пораст на криминалот, за кој главно се обвинува лошата интеграција на имигрантите.
ШВЕДСКА СО НАЈВИСОКА СТАПКА НА ОРУЖЕНО НАСИЛСТВО
Шведска има највисока стапка на оружено насилство по жител во Европската Унија. Минатата година 55 луѓе беа застрелани во 363 одделни инциденти во земјата со само 10 милиони жители. За споредба, имаше само шест фатални престрелки во трите други нордиски земји заедно.
Полицијата вели дека шведските банди во некои случаи им помогнале на проблематичните тинејџери на возраст од 14 години да излезат од домовите за млади за да извршат нарачани убиства во замена за нова облека, готовина и дрога.
Норвешка соопшти дека шведските криминални мрежи сега оперираат во сите делови на земјата. Присуството на бандите стана повидливо, привлечено од повисоките цени на дрогата и помалата конкуренција, објави норвешката полиција во неодамнешното писмо до владата, до кое дојде „Ројтерс“ според норвешкиот акт за слобода на информациите.
Отворените граници на ЕУ им го олеснија движењето на криминалците низ нордискиот регион, но Данска летово го засили надзорот на својата шведска граница и започна поактивно следење на патниците што пристигнуваат со воз од Шведска.
Шведската централнодесничарска влада победи на изборите во 2022 година на платформа за ред и закон и намалена имиграција, а владее со поддршка на екстремно десничарските Шведски демократи. Земјата прими над два милиона луѓе од почетокот на милениумот; околу 20 отсто од населението е родено во странство.
И познат рапер застрелан од банда
Наградуваниот шведски хипхоп-уметник, познат по псевдонимот Ц. Гамбино, на 5 јуни беше смртно застрелан во пресметка меѓу банди, смета шведската полиција. Неговото убиство беше само едно во низата сторени од насилството на бандите што ја зафатија земјата. Ц. Гамбино, на возраст од околу 25 години, беше застрелан двапати во јавна паркинг-гаража во Гетеборг.
Портпаролот на полицијата во Гетеборг рече дека има врски помеѓу уметникот и една или повеќе криминални мрежи.
– Се сомневаме дека злосторството има врски со околината на бандите – рече тој, одбивајќи да образложи.
Шведска со години се бореше да го спречи насилството поврзано со организираниот криминал. Смртоносните престрелки во десетмилионската нација се зголемија повеќе од трипати во текот на изминатата деценија, за значително да ги надминат нивоата во соседните земји. Полицијата проценува дека 62.000 лица се активни или имаат врски со криминалните мрежи.
Покојниот уметник не треба да се меша со американскиот уметник Чајлдиш Гамбино.
Полицијата одби да го сподели вистинското име на раперот.
Во 2021 година, друг шведски рапер, Еинар, чие вистинско име беше Нилс Гронберг, беше убиен на 19-годишна возраст. Една година претходно Ејнар беше киднапиран и нападнат од ривалските рапери.
