Иранскиот претседател Ебрахим Раиси најави одмазда за атентатот врз иранскиот генерал Касем Сулејмани пред две години, од страна на САД.
Како што нагласи тој, одмаздата ќе биде доколку поранешниот американски претседател Доналд Трамп не поднесе одговорност за тој атентат.
Иран и неговите сојузници во Ирак му оддаваат почит на Сулејмани, командантот на елитната единица Ал Кудс, генерал кој имаше култен статус во иранското општество уште пред неговата смрт.
Сулејмани беше убиен на 3 јануари 2020 година во напад со дрон во близина на аеродромот во Багдад, по наредба на тогашниот американски претседател Доналд Трамп.
– Доколку Трамп и поранешниот државен секретар Мајк Помпео не бидат судени пред непристрасен суд за кривично дело убиство на генералот Сулејмани, муслиманите ќе се одмаздат за својот маченик – рече Раиси во својот говор.
Иран во неделата напиша писмо во кое го повика Советот за безбедност на Обединетите нации да ги повика на одговорност САД и Израел, земја за која Техеран исто така тврди дека стои зад атентатот.
Ден по атентатот, САД им соопштија на ОН дека чинот е самоодбрана и дека ќе преземат дополнителни дејствија на Блискиот Исток за да ги заштитат американските интереси ако е потребно.
