„Фокс њуз“ во последен момент постигна договор со „Доминион воутинг системс“, согласувајќи се да плати повеќе од 787 милиони долари за да стави крај на двегодишната правна битка што го наруши кредибилитетот на десничарската телевизиска мрежа. Тоа е највисоката јавно позната спогодба за клевета платена од медиумска компанија во историјата на САД.
„Фокс“ соопшти дека „ги признава одлуките на судот со кои одредени тврдења за Доминион се лажни“, мислејќи на неодамнешната пресуда на судијата Дејвис дека 20 емитувања на „Фокс њуз“ од крајот на 2020 година содржеле очигледно лажни тврдења дека „Доминион“ ги наместил претседателските избори во САД.
Исплатата од 787,5 милиони долари е околу половина од првичните 1,6 милијарди долари што ги побара „Доминион“.
Спогодбата со Доминион ги поштеди влијателните директори на „Фокс њуз“ и истакнатите водители да сведочат за нивното покривање на изборите во 2020 година, кои беа полни со лаги за измама на гласачите.
Списокот на сведоци го вклучуваше претседателот на „Фокс Корпорејшн“ Руперт Мардок, неговиот син и извршен директор Лахлан Мардок и водителите како Шон Ханити и Такер Карлсон.
