Бугарија
Бугарскиот претседател Румен Радев денеска на пратеничката група на БСП за Бугарија ќе ѝ го врачи мандатот за предлагање кандидат за премиер, соопштија од прес-службата на шефот на државата.
Вчера истече рокот во кој претседателот Румен Радев имаше време да одлучи кому да му го предаде мандатот. Ова е последна можност да се формира влада во рамките на 48-то Народно собрание според Уставот, откако пропаднаа првите два обида за формирање редовен кабинет.
Во првиот мандат доделен на ГЕРБ-СДС, кандидатот за премиер, проф. Николај Габровски, собра само 115 гласа за поддршка, а 125 пратеници гласаа против. Поддршка за кандидатурата на проф. Габровски стигна од ГЕРБ, ДПС и Бугарски подем, но гласовите на пратениците од овие партии не беа доволни. Според прописите, кога кандидатот за премиер нема да биде одобрен од Народното собрание, не се гласа за следните две одлуки, за структурата и составот на кабинетот. Пред гласањето, пратениците три часа дебатираа за предлогот за кабинетот.
По неуспехот на ГЕРБ-СДС да формира влада, ПГ на Продолжуваме со промените ја изнесе кандидатурата за премиер на академик Николај Денков, кој ги повика сите партии на разговори за формирање влада. ПП подготви декларација со заеднички приоритети, која собра само 63 гласа за поддршка во пленарната сала. Една недела подоцна, ПП му го врати неостварениот втор мандат на претседателот Радев.
Ако и денеска не се формира влада, Бугарија ќе оди на нови избори.
