Оваа година ќе биде најтопла во светот откако се прават мерења, а се очекува екстремно високите температури да продолжат барем во првите неколку месеци од 2025 година – најавуваат научници од Европската унија.
– Податоците на Европската служба за климатски промени „Коперникус“ (Ц3С) доаѓаат две недели откако климатските разговори на ОН произведоа договор од 300 милијарди долари за борба против климатските промени, пакет што посиромашните земји го нарекоа недоволен за покривање на зголемените трошоци од катастрофи поврзани со климата – пишува „Ројтерс“.
Ц3С вели дека податоците од јануари до ноември потврдиле дека 2024 година сигурно дека ќе биде најтоплата година досега и прва во која просечните глобални температури се повеќе од 1,5 степени над прединдустрискиот период од 1850 до 1900 година. Претходнo најтопла година беше 2023.
Екстремните временски услови го зафатија светот во 2024 година, со големи суши кои ги погодија Италија и Јужна Америка, смртоносни поплави во Непал, Судан и Европа, топлотни бранови во Мексико, Мали и Саудиска Арабија, кои убиваат илјадници луѓе, и катастрофални циклони во САД и во Филипините.
Научните студии ги потврдија отпечатоците на климатските промени предизвикани од човекот на сите овие катастрофи. Минатиот месец беше рангиран како втор најтопол ноември по ноември 2023 година.
– Сè уште сме во речиси рекордно висока област за глобални температури и веројатно ќе остане така барем во следните неколку месеци – рече Џулиен Николас, климатски истражувач на „Коперникус“, во изјава за „Ројтерс“.
Емисиите на јаглерод диоксид од согорувањето на фосилните горива се главната причина за климатските промени.
Намалувањето на тие емисии – како што многу влади ветија дека на крајот ќе направат – ќе го спречи влошувањето на глобалното затоплување. И покрај тие зелени ветувања, глобалните емисии на CO2 ќе достигнат рекордни нивоа оваа година.
Научниците исто така следат дали климатскиот феномен Ла Ниња – кој вклучува ладење на температурите на површинските океани – може да се формира во 2025 година.
Ова би можело накратко да ги олади глобалните температури, иако нема да го спречи долгорочниот тренд на затоплување предизвикан од емисиите. Светот моментално е во неутрални услови, откако претходно оваа година заврши Ел Нињо – потоплиот пандан на Ла Ниња.
– Иако 2025 година би можела да биде малку поладна од 2024 година, ако се случи настан Ла Ниња, тоа не значи дека температурите ќе бидат „безбедни“ или „нормални“ – рече Фридерике Ото, виш предавач на „Империал колеџ“ во Лондон.
– Ќе продолжиме да бидеме изложени на високи температури, кои што ќе резултираат со опасни топлотни бранови, суши, шумски пожари и тропски циклони – додаде таа.
Записите на Ц3С датираат од 1940 година и се споредуваат со податоците за глобалната температура од 1850 година.
