Во текот на вчерашниот ден и официјално заврши првото Светско првенство во 4×4 ватерполо во Млини, Дубровник.
Mакедонскиот претставник, екипата на МКД Мастерс, го заврши својот настап во „Open“ категоријата со натпреварот за 5-тото место.
-Нашите момци одиграа цврсто против тимот на Сребрено, но по изведувањето на пенали го загубија натпреварот со резултат 2:3. Сепак, на вакви турнири, конечниот пласман е секогаш во сенка на целокупното доживување и спортскиот дух кој владее покрај базенот. Вистинскиот момент кој го одбележа турнирот за нашиот тим, а и за присутните, се случи по официјалните финалиња. Во 21:30 часот, МКД Мастерс одиграа ревијален, пријателски натпревар против репрезентацијата на Монголија. Овој тим беше дел од турнирот на „елитните нации“, но станува збор за многу млад, неискусен и новоформиран состав на кој сето ова му беше сосема ново. Македонските ватерполисти доминираа во базенот, но покажаа огромна спортска големина дозволувајќи им на младите Монголци да постигнат погодок, за на крајот да слават со симболични 3:1. Натпреварот беше одигран во повеќе од пријателска атмосфера, пред сè благодарение на одличните домаќини од Хрватска и ВК Гусар – велат од тимот.
Што се однесува до борбата за медалите во „Open“ категоријата, златниот медал го освои екипата на Кокоти, која во големото финале ја совлада екипата на Повратници со 3:2. Бронзата отиде кај Fun H2O кои славеа со 3:0 против Атенто.
Во елитниот дел на првенството, Шпанија се круниса за шампион во машка конкуренција, додека САД доминираа кај дамите забележувајќи перфектен турнир. Репрезентацијата на Хрватска, го завршија турнирот со бронзен медал, а Роко Пелицариќ беше прогласен за МВП.
-Овој турнир докажа зошто го сакаме спортот. Резултатите и медалите ќе се запишат во архивите, но сликите на кои македонското и монголското знаме се веат заедно покрај базенот во Млини се вистинското наследство на овој настан. Спорт ослободен од притисоци, чиста страст и пријателства кои рушат граници. Ова е спортот за кој секогаш ќе известуваме – велат од МКД Мастерс.
