На изложбата „Злато, сребро, бронза. Историја на олимпискиот медал“ централен дел се златните медали на Пааво Нурми, освоени на ЛОИ 1924 во Париз, ненадминат рекорд од пет атлетски злата од едни Игри, пишува Светската атлетика. На отворањето присуствуваа внукот на Пааво Нурми и уште еден повеќекратен олимписки првак од Финска, Ласе Вирен
АТЛЕТИКА
Мика Нурми, внукот на Пааво Нурми, беше на отворањето на изложбата во музејот „Парите на Париз, на која централниот дел се златните медали на неговиот дедо, освоени на Летните олимписки игри (ЛОИ) во Париз во 1924 година, ненадминат рекорд од пет атлетски злата од едни Игри, пишува Светската атлетика (СА). Медалите на Нурми, кои ретко беа изложени во Финска и не ја напуштија земјата откако беа освоени пред еден век, се вратија во Париз за да помогнат во прославата на годинашните ЛОИ во Париз.
Она што ја прави изложбата особено извонредна е тоа што „Парите на Париз“, најстарата национална ковачница во светот, ги изработи медалите за ЛОИ 1924, пишува СА. На изложбата „Злато, сребро, бронза. Историја на олимпискиот медал“ се приклучи и Ласе Вирен, четирикратниот олимписки шампион од Финска, кој освои златни медали на 5.000 и на 10.000 метри на ЛОИ 1972 во Минхен и на ЛОИ во Монтреал во 1976 година.
Пааво Нурми (1897-1973) беше еден од победничките „Летачки Финци“, кои во првата половина на 20 век доминираа во светот на трчањето на средни и на долги патеки, пишува СА. Нурми го наследи именувањето како најголем светски тркач од сонародникот Ханес Колехмаинен (1889-1966), олимпискиот првак од ЛОИ 1912 на пет и на 10 км, кој се врати на олимписката сцена во 1920 година за да ја освои титулата во маратон. ЛОИ 1920 беа први од трите Игри на кои се натпреваруваше Нурми. Во Антверпен, Париз и во Амстердам (1928 г.), тој трчаше од 1.500 до 10.000 метри, вклучувајќи и 3.000 метри со пречки и крос-кантри, освојувајќи вкупно девет златни и три сребрени медали.
– Посебен момент е нашето семејство да знае дека олимписките достигнувања на дедо ми се препознаваат во овој престижен музеј и дека неговите медали ќе бидат изложени за посетителите од целиот свет. Мојот дедо ретко даваше интервјуа и беше речиси исто толку познат по својата тишина како и по својата атлетска моќ, што го направи најголемото име во светскиот спорт. Неговите атлетски достигнувања го издржаа тестот на времето, страхопочитта што ја инспирираат 100 години подоцна кажува сѐ за висината на неговата тркачка кариера – рече Мика Нурми.
Триумфите на Нурми на ЛОИ 1924, особено неверојатната двојна победа на 1.500 и на 5.000 м со помалку од 90 минути помеѓу двете финалиња, го запечатија неговиот легендарен олимписки статус, пишува СА. Приказната за кроскантри-трката (6,84 км) влезе во историјата на ЛОИ. Официјалниот извештај забележа дека температурата е околу 45 степени, но дека индустрискиот оџак во близината на реката Сена што влијаел на две третини од патеката значел дека температурата на воздухот за тој дел била дури 60 степени. Од 38 стартери, 23 не ја завршиле трката, а неколку атлетичари биле пренесени во болница откако колабирале. И покрај временските услови, Нурми релативно лесно истрчал, победувајќи со околу 400 м предност пред сонародникот Вил Ритола. Начинот на победата на Нурми беше извонреден со оглед на тоа што самиот Ритола освои четири злата и две сребра во Париз. Во Париз, Нурми беше толку недостижен, недопирлив противник, што американските спортски писатели почнаа да го нарекуваат „Фантомски Финец“, пишува СА.
– Името на Нурми останува многу познато во Финска. Тој е народен херој. Прекрасно е што неговите достигнувања се почестени на оваа одлична изложба во градот што беше сведок на најголемата од неговите победи – рече Вирен.
Париските злата на Нурми се само еден дел од изложбата, која е организирана од музејот на француската ковачница по повод ЛОИ 2024. Н.М.
