Кај ракометарите овој тренд можевме јасно да го видиме дури по третиот турнир со 24 селекции. Сега ќе видиме некои јасни резултати на ЕП за ракометарки, но генерално зголемувањето на 24 репрезентации ќе има позитивен ефект, квалитетот ќе се зголеми, сигурен сум, вели Видерер, претседателот на ЕХФ
РАКОМЕТ
Кај ракометарите го имавме првиот турнир со 24 учесници и три домаќини во 2020 година. Искуството покажа дека од 1994 до 2018 година, 75 отсто од учесниците биле постојано исти. За многу селекции во Европа тоа значеше дека мотивацијата за учество во квалификациите не беше толку голема, бидејќи шансата да се обезбеди пласман на европско првенство (ЕП) беше мошне мала. Со квалификациите за ЕП 2020 ова е целосно променето, интересот, но и нивото на перформанси во квалификациите насекаде беа многу поголеми. Овие земји имаа огромна корист од зголемувањето, а резултатите беа видени најдоцна на годинашното ЕП, кога БиХ, Грузија и Фарските Острови одиграа многу силно на теренот и не беше лесно да се победат, изјави Михаел Видерер, претседателот на Европската ракометна федерација (ЕХФ), во интервју за ЕХФ пред почетокот на првото ЕП за ракометарки со 24 селекции, кое почна вчера.
Дали ова искуство може да се пренесе и на турнирите за ракометарки?
– Тоа ќе биде одговорено во 2028 година, бидејќи кај ракометарите овој тренд можевме јасно да го видиме дури по третиот турнир со 24 репрезентации. Сега ќе видиме некои јасни резултати на турнирот за ракометарки, но генерално зголемувањето на 24 селекции ќе има позитивен ефект, квалитетот ќе се зголеми, многу сум сигурен – вели Видерер.
Има ли нешто што ЕХФ го научи на ЕП 2024 за мажи и сега им го пренесува на домаќините на ЕП за жени?
– Дефинитивно во техничката област, на пример во однос на употребата на камерата за гол и видеорепризата. Тоа е помалку за самата технологија, повеќе за имплементација. Работиме на ракување, а не на понатамошни технички иновации. И секогаш сакам да нагласам дека такви технологии воведовме пред фудбалот и како ЕХФ секогаш му придаваме важност на тоа дека одлуките не се носат од надворешен ВАР, туку директно на теренот од судиите. Ова секогаш се покажувало успешно во ракометот – рече Видерер. Н.М.
