Победникот веќе се наѕираше по првото полувреме, кога гостинките поведоа со 52-26, благодарејќи на цврстата одбрана и ефикасниот напад
Женската сениoрска кошаркарска репрезентација на Македонија, во СРЦ „Кале“ во Скопје, го доживеа и третиот пораз во квалификациите за Европското првенство (ЕП) 2025, кое ќе се игра во Чешка, Германија, Италија и во Грција. Украина, предводена од селекторот Евгениј Мурзин, беше пресилна за избраничките на македонскиот селектор Александар Ашаданов и убедливо славеше со 98-49 (26-13, 26-13, 27-7, 19-16). Победникот веќе се наѕираше по првото полувреме, кога гостинките поведоа со 52-26, односно со 26 коша разлика, благодарејќи пред сѐ на цврстата одбрана и ефикасниот напад.
– Клучен момент на натпреварот е физичката игра. Сепак, ова е натпреварување каде што контакт-играта е една од најважните работи. Ние не му возвративме на противникот, како што тие го правеа тоа во текот на целиот натпревар. Тие 11 офанзивни скокови на полувремето се премногу, доколку сакаме поволен резултат. Но ќе го оставиме ова зад себе, ќе анализираме и со бистри глави ќе се подготвуваме за следниот противник. Знам, и уверен сум дека ова не е најдоброто од нас – вели селекторот Ашаданов.
Најефикасни во македонските редови беа Анџелика Митрашиновиќ со 17 коша, седум скока и пет асистенции и Мерит Хемпе со поен помалку и пет скока. Кај Украинките доминираа Викториа Балабан со 19 поени, пет скока и три асистенции и Алина Јагупова со 17 коша, три скока и шест асистенции. Во вториот меч од оваа група, Србија на свој терен убедливо ја совлада Португалија со 71-37 и е во водство со максимални три победи.
Во следното коло, утре, Македонија повторно ќе игра во СРЦ „Кале“ (18 часот), овој пат против Португалија, во рамките на четвртото коло во квалификациите за ЕП. На ЕП 2025 ќе се пласираат победниците во групите, како и четирите најдобри второпласирани во осумте групи. Г.И.
ГРУПА Г, 3. КОЛО
Македонија – Украина 49-98
Србија – Португалија 71-37
ТАБЕЛА
1. Србија 3 3 0 256-137 6
2. Португалија 3 2 1 180-186 5
3. Украина 3 1 2 201-209 4
4. Македонија 3 0 3 161-266 3
Идно коло, утре: Македонија – Португалија (18 ч.), Украина – Србија (20.30 ч.)
