Во 2022 година меѓународните трансфери на фудбалери првпат надминаа 20.000, растот во женскиот фудбал продолжи и речиси 50.000 аматери заминуваа во клубови во странство, објави ФИФА
ФУДБАЛ
Во 2022 година биле направени рекордни за една година 71.002 меѓународни трансфери, од тоа 21.764 професионалци (мажи и жени) плус 49.238 аматери, објави Светската фудбалска федерација (ФИФА) во новиот Глобален извештај за трансфери за 2022 година.
Имаше 20.209 меѓународни трансфери во машкиот професионален фудбал во 2022 година, што е зголемување од 11,6 отсто во споредба со 2021 година, па дури и надминување на нивоата од 2019 година пред пандемијата на ковид-19. Овие трансфери вклучуваа ново рекордно високо ниво од 4.770 клуба од 182 различни асоцијации, во споредба со 4.538 клуба во 2021 година. Вкупно 17.291 играч од 183 националности го смениле клубот во 2022 година, пишува ФИФА.
– Двегодишниот негативен тренд во трошењето на клубовите за обесштетувања беше сменет во 2022 година, при што вкупниот расход лани достигна 6,5 милијарди долари, што е зголемување од 33,5 отсто во споредба со 2021 година, но, сепак, под највисокото ниво на сите времиња во 2019 година – вели Емилио Гарсија Силверо, главен службеник за правни работи во Светската фудбалска федерација.
Само првите десет трансфери генерираа 12,5 проценти од целата сума што беше потрошена за трансфер-такси во 2022 година, англиските клубови повторно се на врвот на листата, а првпат нивниот вкупен расход ја надмина границата од две милијарди долари и достигна рекордно високо ниво од речиси 2,2 милијарди долари, пишува ФИФА.
Со вкупни приходи од 740,3 милиони долари, клубовите од Франција добија најголем дел од сите асоцијации. Првпат португалските клубови завршија повеќе дојдовни трансфери од клубовите од која било друга асоцијација, со вкупно 901 трансфер во клубови во таа земја во 2022 година, а Бразил имаше најголем број фудбалери, вкупно 998, кои заминале во странство, пишува Светската фудбалска федерација.
Импресивниот раст во женскиот професионален фудбал продолжи уште еднаш во 2022 година. Бројот на меѓународни трансфери е повеќе од двојно зголемен од 2018 година. Бројот на клубови вклучени во меѓународни трансфери се зголеми од 410 во 2021 година на 500 минатата година, што е зголемување од 22,0 отсто.
– Во 2022 година се регистрирани околу 1.555 меѓународни трансфери, што е зголемување од 19,3 отсто во споредба со претходната година, а новото високо ниво е 119 асоцијации што биле вклучени во меѓународните трансфери – вели Гарсија Силверо.
Во 2022 година имаше повеќе од двојно повеќе аматерски трансфери од професионални трансфери, при што вкупно 49.238 аматери се преселија преку границите.
