Во Германија секогаш се навраќаме на 2006 година и на тоа како Светското првенство нѐ зближи, истовремено обезбедувајќи можност да им посакаме добредојде на другите во нашата земја. Планираме да го повториме тоа, ажурирано за модерното време. Како директор на турнирот сакам да поттикнам одлична атмосфера и безбедно ЕП, фудбалски фестивал што трае еден месец, вели за УЕФА директорот на турнирот, Филип Лам
ФУДБАЛ – ПОЧНУВА ПАТОТ КОН ЕП 2024
Почетокот на квалификациите утре за пласман на Европското првенство (ЕП) в година во Германија сигнализира уште еден голем момент во одбројувањето до ЕП 2024, а директорот на турнирот, Филип Лам, вели дека едвај може да ја задржи возбудата, пренесува Европската фудбалска унија (УЕФА). Прославениот поранешен дефанзивец на Германија зборува за аспирациите за финалето следното лето, негуваните спомени од последниот домашен турнир во Германија и за непосредниот предизвик за селекторот Ханси Флик.
– Со нетрпение очекуваме да бидеме домаќини на ЕП 2024. Одржувањето на големите турнири секогаш е многу посебно и сакаме да организираме одличен заеднички настан каде што сите ќе бидат добредојдени. Во Германија секогаш се навраќаме на 2006 година и на тоа како Светското првенство нѐ зближи, истовремено обезбедувајќи можност да им посакаме добредојде на другите во нашата земја. Планираме да го повториме тоа, ажурирано за модерното време. Ова е голема шанса за Германија, одлична можност да покажеме за што се залагаме, дека сите се добредојдени, дека се залагаме за различноста – вели Лам, пренесе УЕФА.
Тој се осврна и на организацијата на Светското првенство во 2006 година во Германија
– Во далечната 2006 година многу луѓе се собраа на јавни проекции и славеа заедно, без разлика од каде потекнуваат, која е нивната боја на кожата или која религија ја следат. Играв, но пријателите и семејството уште зборуваат до ден-денес за тоа колку беше одлично тогаш. Народот се собра, заедно славеше и заедно се забавуваше. Тоа беше многу посебно и ЕП 2024 нуди шанса да го направиме тоа повторно. Како директор на турнирот сакам да поттикнам одлична атмосфера и безбедно ЕП, фудбалски фестивал што трае еден месец.
Како Германец, исто така, сакам да видам одличен тим домаќин вклучен до крајот на натпреварувањето. Германија беше исфрлена од последните три турнири предвреме, во групната фаза на последните две светски првенства и на осминафиналето на ЕП 2020. Сепак, играњето на домашен терен е голема предност. Се сеќавам како може да те поттикне. Домашниот тим треба прво да ја возбуди домашната публика, но потоа тоа е двонасочна улица. Одлично е да се бодри, особено ако мечот се ближи кон крајот и е неизвесен. Тоа е навистина посебно. За СП 2006 првиот натпревар беше против Костарика во мојот роден град Минхен, како и во 2024 година. Имав навистина среќа што можев да го постигнам првиот гол за победнички почеток. Сегашната селекција треба да се докаже во подготовките за турнирот, треба да направи нешто што може да ја запали домашната публика и обратно. Важно е тимот да се најде себеси и да влезе во него на врвот на бранот. Притисокот ќе биде огромен, но повеќе се работи за радоста. Тоа е посебна можност за играчите, тимот и за земјата – рече Лам. Н.М.
