Техно
Гугл мапс воведува построги мерки против лажни рецензии, вклучувајќи предупредување за корисниците и блокирање деловни профили. За многумина од нас, читањето рецензии на платформата Гугл мапс стана редовна практика пред да посетиме некое место. Со цел мислењата на корисниците вистински да ја одразуваат реалната слика, „Гугл“ сега најави чекори за стопирање на деловните профили што прибегнуваат кон лажни критики за да ја подобрат нивната репутација.
Компанијата објави нови правила и ограничувања како дел од својата политика за лажни ангажмани, а оние што ќе ја прекршат ќе се соочат со последици како привремено отстранување на прегледите, блокирање нови рејтинзи и прикажување предупредувања на навредливи профили. Овие мерки веќе се видливи за корисниците од Велика Британија, а се очекува во наредниот период да добијат светски размери.
Според правилата на Гугл мапс, прегледите на оваа платформа мора да го одразуваат вистинското искуство на корисниците со одреден деловен простор или производ. „Гугл“ строго им забранува на деловните профили да поддржуваат содржини што не прикажуваат реална слика, односно да ги мотивираат корисниците со попусти, паричен надоместок или бесплатни услуги да остават добра рецензија. Платформата ќе користи напредни системи и човечки модератори за да ги препознае злонамерните активности на оние што користат повеќе сметки, емулација или модифицирани оперативни системи за да симулираат автентични оценки на корисници.
Можноста за јавно означување и засрамување на деловните профили може да биде доволна пречка за многу претприемачи, а предупредувањата ќе служат како заштита за корисниците од посета на непроверени или потенцијално проблематични страници. Како точно ќе изгледа спроведувањето на овие мерки надвор од Велика Британија останува да видиме. Сепак, јасно е дека Гугл мапс е сериозен во борбата против манипулациите и погрешните практики на својата платформа.
