Полумаратонот во Пекинг „Е-Таун“ одржан на 19 април, привлече големо внимание, бидејќи кинеските хуманоидни роботи покажаа брз напредок во брзината, издржливоста и автономијата.
Хуманоидниот робот „Лајтнинг“ (во превод молња), развиен од тимот „Китиан Дашенг“, победи со време од 50 минути и 26 секунди, надминувајќи го актуелниот светски рекорд во полумаратон во машка конкуренција.
Минатата година учествуваа нешто повеќе од 20 тима, во споредба со повеќе од 100 годинава, што ги одразува растечкиот интерес и брзиот технолошки напредок.
– Речиси 40 проценти од тимовите постигнаа автономна навигација годинава. Сведоци сме на пробиви низ моделите, алгоритмите, дизајнот и интеграцијата на хардверот. Целта е да се забрза и технолошкиот и индустрискиот развој – рече Лианг Лианг, заменик-генерален секретар на Кинескиот институт за електроника.
Подобрувањата на перформансите во рок од една година се навистина впечатливи. Времето на завршување се намали од над два часа во 2025 година на помалку од еден час годинава. Тимовите го припишуваат напредокот на големите подобрувања во издржливоста на материјалот, сигурноста на системот и отпорноста на топлина на зглобовите – клучни фактори што овозможуваат одржливо работење на долги растојанија.
За многу тимови, трката стана тест за иновации. Роботите што се натпреваруваа годинава беа видливо многу поспособни од порано. Ултрабрзата замена на батерии на роботите претставуваше главна карактеристика на настанот. Завршена за помалку од 10 секунди, прецизната операција беше брза како оние во пит-стоповите во трките на „Формула 1“.
Сите пет меѓународни тима избраа основни модели произведени во Кина, истакнувајќи го растечкиот тренд на „кинески хардвер, глобална интелигенција“. Само еден робот ја освојува титулата, но секој тим што стигнал до стартната линија се смета за победник. Како што вели слоганот на настанот: „кој учествува е херој, кој завршува освојува слава“. Како што спортот и технологијата се спојуваат, така се забрзуваат и машините и самото темпо на иновации.
