Полската влада соопшти дека може да биде принудена да ја изведе Германија на суд поради отпад, дел од него токсичен, кој се транспортирал и се складирал во неовластени депонии, пренесува „Дојче веле“
Ѓубрето ги скара Варшава и Берлин
Полската министерка за животна средина Ана Москва неодамна ја повика Германија да го врати отпадот наводно фрлен нелегално преку границата во Полска. Москва на прес-конференција рече дека Варшава веќе поднела жалба до Европската комисија како прва фаза за можна правна постапка.
Што рече полската министерка?
Полската министерка за животна средина рече дека најмалку 35 тони германски отпад се наоѓале на територијата на Полска во седум различни депонии. Таа истакна дека германската влада и локалните власти не успеале да одговорат на барањето за отстранување, при што Берлин им ја префрлил цената на одделни германски покраини.
Москва истакна дека повеќепати било интервенирано кај нивните германски западни соседи, и на државно и на федерално ниво, повикувајќи на отстранување на германското ѓубре што незаконски се наоѓало на полска територија. Германската федерална влада одговорила дека тоа е надлежност на германските сојузни држави, кои не брзале да преземат каква било акција. Во очигледна референца за Зелената партија, која е дел од трипартиската владејачка коалиција во Германија, Москва рече дека повиците биле насочени кон германската „екстремно зелена влада“.
Брисел и Берлин сѝ уште чекаат
Европската комисија соопшти дека иако знаела за извештаите за нерешена жалба од Полска сè уште не го добила официјалниот документ. Германското министерство за животна средина соопшти дека нема жалба и дека не може конкретно да коментира за тоа. Сепак, портпаролот Кристофер Штолценберг рече дека, генерално, нелегалниот извоз на отпад е нешто на што германската влада гледа со загриженост. Тој потврди дека сојузните влади, наместо Берлин, се одговорни за истрага, следење и наредба за враќање на нелегалниот извоз, но додаде дека Берлин се обидува да помогне „неформално“ каде што може.
Прашање за изборна кампања
Странскиот отпад складиран во Полска е проблем со години, но тој стана политички жежок компир во пресрет на полските избори што треба да се одржат подоцна оваа година. Тоа стана особено спорно откако околу 5.000 тони хемиски отпад изгореа во складиште во западна Полска.
Актуелната полска национална конзервативна влада Право и правда (ПиС) ја обвини опозицијата. Таа посочи дека либерално-конзервативната Граѓанска платформа (ПО) дозволила непречен увоз на опасен отпад за време на нејзиниот мандат. Во меѓувреме, ПО, која не е во власта од 2015 година, ја обвини полската влада дека не ги надгледувала депониите правилно.
