Употребата на ласер како дел од оружјето е прва од ваков вид во воената морнарица на САД, истакнува Кејлеб Ларсон за „Нешенел интерест“
Неодамна, американската морнарица објави дека извршила тестирање на ново ласерско оружје. Според соопштението објавено од морнарицата, во спроведеното тестирање, копнениот ласерски систем лоцирал и нишанел на црвен дрон што прелетал покрај него, притоа истрелал зрак со висока енергија невидлив со голо око. Тестирањето, кое беше изведено во февруари оваа година, беше првпат САД да тестираат, како што го нарекоа, целосно електричен високоенергетски ласер. Предметната цел претставуваше „супсонична крстосувачка ракета во лет“. Ласерот, кој беше дизајниран од „Локхид Мартин“ и наречен слоевита ласерска одбрана (ЛЛД), може да им се спротивстави на различни системи, вклучувајќи и чамци за брзи напади, како и беспилотни воздушни системи.
Началникот на поморските истражувања на морнарицата, вицеадмиралот Лорин К. Селби, истакна дека иновативните ласерски системи како ЛЛД имаат потенцијал да ја редефинираат иднината на поморските борбени операции. Тие претставуваат трансформациски капацитети на флотата, се справуваат со различни закани и обезбедуваат прецизни ангажмани со поголема муниција за да ги дополнат постојните одбранбени системи и да ја подобрат одржливата смртност во конфликти со висок интензитет.
Интересно е тоа што американската морнарица објасни дека всушност не постои конкретен план за распоредување на ваквиот ласерски систем на бродовите на морнарицата. Наместо тоа, ласерот нуди поглед во иднината на ласерското оружје. Тој е компактен и моќен, но сепак поефикасен од претходните системи. Тој располага со специјализирана оптика за набљудување на целта и фокусирање на ласерските зраци со максимален ефект, а истовремено вклучува и вештачка интелигенција за подобрување на следењето и целењето. Американската морнарица го користеше новото ласерско оружје за соборување дронови со голема брзина, како и летала со фиксни крила.
Иако американската морнарица спроведе слично тестирање на технологијата за ласерско оружје во 1980-тите, тие тестови вклучуваа ласерско оружје засновано на хемикалии, што за морнарицата предизвика многу значајни логистички проблеми. Овие најнови тестови на ЛЛД, сепак, вклучуваат целосно електричен систем, што ѝ нуди на морнарицата да црпи практично неограничен капацитет на муниција.
