Многу рецензии веќе се напишани за новиот „ајфон 12“, кој од неделава почна да се продава на светските пазари. Кога ја претстави својата најнова линија паметни телефони на виртуелен настан на 13 октомври, „Епл“ стави голем акцент на 5Г-технологијата, што изненади многумина, имајќи предвид колку компанијата доцни со неа. Една од причините е што конкурентските брендови на паметни телефони веќе подолго време поддржуваат 5Г, иако самата покриеност со 5Г-мрежи е сè уште просечна во повеќето земји, вклучувајќи ги и САД.
Додека покриеноста останува проблем, корисниците на 5Г се поврзани преку 5Г само 21 отсто од времето во САД и уште помалку во повеќето европски земји, брзината на новиот стандард за вмрежување е всушност огромниот скок напред. Според анализата спроведена од „Опен сигнал“, помеѓу 1 јули и 28 септември оваа година, корисниците на 5Г често достигнуваат брзина на преземање што е неколкупати поголема од брзината на 4Г. Иако тоа важи и за САД, каде што 5Г е во просек 1,8 пати побрз од 4Г, САД заостануваат во однос на другите земји според брзината, особено со 5Г-мрежите.
Во однос на новите „ајфони“, многу експерти предупредуваат дека клиентите би можеле да бидат разочарани од актуелните перформанси на 5Г, што, иако не е вина на „Епл“, може да ги зголеми првичните негативни реакции кон новите уреди. Типично сочинувајќи околу 60 отсто од приходите на „Епл“ во празничниот последен квартал, продажбата на „ајфон“ е клучна за успехот на компанијата и покрај постојаните напори од страна на „Епл“ да ја намали зависноста од популарниот паметен телефон.
