Градоначалничката Данела Арсовска размислува да побара референдум за тоа дали граѓаните на Скопје сакаат да го видат воведувањето на Бас рапид транзит (БРТ) системот или трамвајот на тркала.
„Имавме состанок со ЕБОР, на кој јас ги елаборирав сите работи што се ризици во процесот. Тука имаме и состојба во која граѓаните одбраа поинаков концепт преку изборите. Во самата програма понудив проекти за кои граѓаните одлучија. Референдумот е една од опциите дали граѓаните сакаат едно или друго решение. Тоа не го исклучувам. Ќе почнеме да го практикуваме за секое клучно прашање. За БРТ-системот скопјани не се консултирани. Исто така, граѓаните не се запознаени целосно со проектот, а јас низ изборната кампања ги објаснив ризиците за овој вид транспорт“, рече Арсовска вечерва во емисијата „Само интервју“ на телевизијата „Канал 5“.
Арсовска неодамна имаше средба со претставници на Европската банка за обнова и развој (ЕБОР) за проектот БРТ Скопје, но не беа објавени повеќе информации од средбата.
Со БРТ-системот, кој е проект на претходниот градоначалник Петре Шилегов, се воспоставуваат две линии со коридори резервирани само за ултраеколошки автобуси – од Ѓорче Петров до Ново Лисиче, и од Бутел до Кисела Вода. Трасата во правец запад-исток е во должина од 12,8 километри во една насока, со 21 станица, а трасата во правец север-југ е во должина од 10,4 километри и предвидено е да има 20 автобуски станици.
Делницата од Ново Лисиче до Ѓорче Петров, предвидено е да се поминува за околу 30 минути.
