Фото: МИА

Во врска со лажните дојави за бомби во училиштата поднесена прва кривична пријава

Секторот за борба против тероризам, насилен екстремизам и радикализам при Одделот за сузбивање организиран и сериозен криминал поднесе кривична пријава до Основното јавно обвинителство за гонење организиран криминал и корупција против малолетник од Скопје, за сторено кривично дело „тероризам“ предвидено и казниво по членот 394-б став 2 од Кривичниот законик.
Имено, пријавениот малолетник инспириран од претходни објави за поставени бомби во неколку средни училиштата на територијата на Скопје, во периодот од 26.10.2022 до 02.11.2022 година, на социјалните мрежи забележал дека пораките биле испратени преку конкретен провајдер, кој нуди криптирање и заштита на комуникацијата, при што на 4.11.2022, од неговиот персонален компјутер, пристапувајќи на интернет на еден телекомуникациски оператор, креирал електронска адресата на конкретниот провајдер, преку која напишал заканувачка порака за поставени експлозиви во четири средни училишта.
Истиот ден, користејќи посебна апликација, преку својот мобилен телефон се поврзал на својот персонален компјутер и во 14.9 часот, од претходно креираната електронска адреса на службените електронски адреси на четирите средни училишта во Скопје, ја испратил горенаведената порака со заканувачка содржина.
Од страна МВР-ОСОСК-СБПТНЕР-Единица за откривање и демонтирање експлозивни средства и направи е извршена антитерористичка проверка на сите училишта што ја добиле порака, при што не се пронајдени експлозивни направи.
Со цел обезбедување докази, од страна на Секторот за борба против тероризам насилен екстремизам и радикализам во соработка со Секторот за компјутерски криминал и дигитална форензика и Секторот за меѓународна полициска соработка се преземени мерки, при што е утврдено дека електронската адреса на пријавеното лице била креирана на 4.11.2022 година во 11.17 часот од ИП-адреса, за која од страна на телекомуникациски оператор се доставени податоци дека сопственик е Д.К.Ч. (43) од Скопје, мајка на кривично пријавеното малолетно лице.
Врз основа на издадени наредба од судија на претходна постапка при Основен кривичен суд – Скопје, на 7.11.2022 година е извршен претрес на дом и други простории каде што живее Д.К.Ч., при што се одземени десктоп-компјутер, еден мобилен телефон и СИМ-картичка, кои ги користел малолетникот, а од страна на Секторот за компјутерски криминал и дигитална форензика е извршен преглед во електронските уреди што ги користи кривично пријавениот, при што е утврдено дека на 4.11.2022 година преку интернет-пребарувач било пристапено на конкретниот сервис-провајдер, а врз основа на наредби од ОЈО за ГОКК е извршено вештачење на електронскиот доказен материјал, при што е утврдено дека пријавениот платил за закупување пакет од провајдерот за користење безбедна електронска пошта.
На 7.11.2022 во ПСОН-Карпош, во присуство на родител, инспектор за малолетници и семејно насилство од СВР-Скопје и адвокат, е извршен разговор со пријавениот малолетник, при што тој го призна и го појасни начинот на извршување на кривичното дело.