Кина денес ги повика САД да дозволат Светската здравствена организација (СЗО) да го испита потеклото на тамошното избувнување на епидемијата на ковид-19, откако СЗО ја заврши својата теренска работа во кинескиот град Вухан.
– Ние сакаме американската страна, како Кина, да заземе отворен и транспарентен став и да ги повика експертите на СЗО во САД да спроведат истражување и контрола на потеклото на коронавирусот – изјави портпаролот на кинеското Министерство за надворешни работи Ванг Венбин.
Неколку часа откако тимот на СЗО ги објави прелиминарните откритија на прес-конференција во Вухан во вторникот, Вашингтон рече дека сака детално да ги испита податоците што ги користел тимот за да заклучи дека вирусот што предизвикува ковид-19 не потекнува од лабораторијата во Вухан, а дека лилјаците остануваат веројатен извор на инфекција.
Секретарката за печат на Белата куќа, Џен Псаки, изјави дека американската влада не е вклучена во планирањето и спроведувањето на истрагата на СЗО и дека сака да спроведе независна ревизија на наодите и основните податоци на оваа мисија, што предизвика многу негативни реакции во Кина.
Потеклото на пандемијата на коронавирусот, која наводно за прв пат се појави во Вухан на крајот на 2019 година, е многу политизирано, а Кина ја застапува теоријата дека ковид-19 пристигнал во земјата од странство, според агенцијата.
