Масовните антивладини протести во Тирана денеска ескалираа во судири меѓу демонстрантите и полицијата. Учесниците фрлаа камења и пиротехнички средства кон полициските сили и државните институции, додека полицијата интервенираше со водени топови и солзавец. На повеќе локации во градот беа запалени контејнери за отпад, кои на места беа поставени како барикади.
Протестот започна во 14 часот пред Министерството за образование, а подоцна се прошири кон централното градско подрачје и зградата на Владата. Според албанската новинска агенција АТА, студентите и граѓаните изразиле незадоволство од состојбите во земјата, оценувајќи дека Албанија станала неподносливо место за живеење и барајќи промени во раководството.
Претходно во текот на денот, лидерот на опозициската Демократска партија, Сали Бериша, предводеше собир пред зградата на премиерот. По околу еден час, пратеници и поддржувачи на партијата се упатија кон Министерството за образование. На улицата „Руга е Дуресит“ се сретнале со група млади луѓе кои скандирале „Рама во затвор, Бериша во затвор“.
Според извештаите од протестите, дел од поддржувачите на Демократската партија ваделе плочки од тротоарите и ги запалиле столиците што премиерот Еди Рама ги поставил пред зградата на Владата како покана за дијалог со студентите.
Како што растеле тензиите, демонстрантите почнале да фрлаат камења кон Министерството за образование и полицијата, која употребила водени топови и солзавец. Протестот продолжил кон плоштадот „Скендербег“, а потоа и кон зградата на Владата, каде што повторно дошло до судири.
Демонстрантите фрлале камења и пиротехнички средства кон полицијата, која возвратила со водени топови и солзавец, потиснувајќи ги насобраните. На влезот од улицата „Муслим Шири“ биле извлечени и запалени контејнери за отпад, со што била формирана барикада. Полициските сили продолжиле да напредуваат со поддршка од пешадиски единици и возило со воден топ.
Протестите се одржуваат во услови на засилено политичко и социјално незадоволство во Албанија. Опозициската Демократска партија, предводена од Бериша, во изминатите месеци организираше повеќе демонстрации со барање за предвремени избори, обвинувајќи ја Владата за корупција, лошо управување и влошување на животниот стандард.
Паралелно, студентски и граѓански групи изразуваат незадоволство од економските услови, високите трошоци за живот, иселувањето на младите и состојбите во образовниот систем. Меѓу нивните главни грижи се и можностите за вработување, социјалната сигурност и перспективите за младите во земјата.
