Вештачката интелигенција пред Советот за безбедност на Обединетите нации
- Водечките компании и експерти предупредуваат на ризиците од моќната технологија, додека САД се спротивставуваат на глобална регулаторна шема, а Кина и ОН повикуваат на меѓународна соработка и надзор
Водечките светски компании за вештачка интелигенција (ВИ) завчера го предупредија Советот за безбедност на Обединетите нации (ОН) за ризиците што ги претставува оваа сè помоќна технологија за човештвото, апелирајќи до националните влади да работат заедно за да управуваат со неа. Состанокот свикан од Франција за време на годишниот собир на светските лидери на Генералното собрание на ОН доаѓа во екот на предупредувањата што тврдат дека системите за вештачка интелигенција наскоро би можеле да се оттргнат надвор од човечката контрола.
Истовремено, лидерите од 22 нации неделава усвоија декларација во која се наведува дека вештачката интелигенција мора да остане под човечко водство, надзор и контрола, со предлог за создавање глобален надзорен режим.
Различни пристапи на двете водечки сили во развојот на вештачка интелигенција
Владите низ светот се борат да одат во чекор со брзиот напредок на вештачката интелигенција. Соединетите Американски Држави и Кина, двете водечки сили во развојот на вештачката интелигенција, имаат различни пристапи кон надзорот на технологијата.
Американскиот претседател Доналд Трамп тврдеше дека на САД не им се потребни нови регулативи специфични за вештачката интелигенција, додека Кина воведе правила што ги регулираат алгоритмите на вештачката интелигенција и податоците за обука, вклучувајќи барања содржината генерирана од вештачка интелигенција да биде јасно означена.
Трамп во вторникот им рече на светските лидери на Генералното собрание на ОН дека „отфрла секаков обид за изградба на глобалистичка шема за контрола“ на вештачката интелигенција, опишувајќи ја технологијата како неверојатна, но истакнувајќи дека САД ќе бидат внимателни.
Советникот за наука и технологија на Белата куќа, Мајкл Крациос, го повтори ставот на американскиот претседател во своите забелешки пред Советот за безбедност на ОН еден ден подоцна.
– Не можете да управувате со технологија што не ја разбирате. Ова тело и други слични треба да се фокусираат на споделување најдобри практики за градење домашни капацитети, а не на воспоставување глобална регулаторна шема – рече тој.
Амбасадорот на Кина во ОН, Фу Конг, пак, рече дека е потребно континуирано подобрување на регулаторните рамки, реагирање во итни случаи и прекугранична соработка за вештачката интелигенција.
– На меѓународната заедница е да соработува потесно, да им придава еднаква важност на развојот и безбедноста и да го насочува развојот на вештачката интелигенција кон позитивно, за добро и за човештвото – кажа тој пред Советот за безбедност.
Генералниот секретар на ОН, Антонио Гутереш, кој долго време се залага за глобално управување со вештачката интелигенција, предупреди дека брзото напредување на вештачката интелигенција носи ризици што не можат да се игнорираат, ставајќи го во конфликт со Трамп.
Советот за безбедност се состана за првпат за ризиците од вештачката интелигенција во 2023 година, кога Кина соопшти дека технологијата не треба да стане „коњ без узди“, а САД предупредија против нејзината употреба за цензура или репресија на луѓето. Тогашниот државен секретар на САД, Ентони Блинкен, претседаваше со состанокот на Советот за безбедност за вештачката интелигенција во 2024 година.
Предупредувања и апели за соработка од водечки експерти
Канаѓанецот Џошуа Бенџо, копретседателот на Независниот меѓународен научен панел создаден од Генералното собрание на ОН минатата година, пред Советот за безбедност нагласи дека „опасностите се реални и неизбежни“.
– Овој совет се соочува со невидена закана, која ниту еден од неговите членови не би ја избрал, која никој не може сам да ја ограничи и која не ги почитува границите што ги браниме – посочи Бенџо.
Извршниот директор на компанијата „Антропик“, Дарио Амодеи, верува дека „вештачката интелигенција може да биде ризик за човештвото како целина“ ако со неа не се управува соодветно, како што истакна тој пред 15-члениот совет, кој е задолжен за одржување на меѓународниот мир и безбедност.
– И покрај сите разлики меѓу луѓето во оваа просторија, мора да ги оставиме настрана тие разлики за да се соочиме со оваа глобална можност и глобална закана што ни се претставува во исто време. Ниеден лидер, ниедна компанија и ниедна нација не можат сами да се справат со ова – рече Амодеи.
Двојна улога на моќната технологија
Коосновачот на компанијата „Хагинг фејс“ (Hugging Face), Клеман Деланж, ја истакна двојната улога на алатките за вештачка интелигенција при сајбер-напади, како за нивно извршување така и за одбрана. Тој наведе инцидент во кој т.н. агенти за вештачка интелигенција (автономни софтверски системи) на американскиот гигант „ОпенАИ“ ја пробиле инфраструктурата на неговата компанија откако излегле од контрола од нивната средина за тестирање.
– Бевме нападнати од вештачка интелигенција, но, што е поважно, се одбранивме со вештачка интелигенција – изјави тој пред советот, додавајќи дека неговата компанија се потпрела на кинески модел на вештачка интелигенција при одбраната од нападот.
Австралискиот премиер Ентони Албанезе им рече на новинарите во Њујорк дека агент за вештачката интелигенција развиен од „ОпенАИ“ се инфилтрирал на веб-страницата на австралиската влада во јуни, пристапувајќи до јавни и приватни досиеја. Р.С.
Европски технолошки лидери: Ширењето паника ја попречува потребната работа
Европските технолошки лидери и експерти за сајбер-безбедност сметаат дека ширењето паника за улогата на вештачката интелигенција попречува во работата за нејзино регулирање, за намалување на ризиците и за понатамошен напредок, пренесува „Политико“.
Среде стравувањата дека моделите на вештачка интелигенција би можеле да му наштетат на човештвото, тие велат дека „сите предупредувања за негативни сценарија се пречка за тешката работа во новата реалност на вештачката интелигенција“.
„Политико“ наведува дека американските компании што ги градат најнапредните модели на вештачка интелигенција во голема мера се одговорни за подигањето на сомнежот дека вештачката интелигенција би можела да доведе до пропаст на човечката раса.
Сепак, за оние што се задолжени да ги бранат компјутерските системи, застрашувачкиот хор од предупредувања за напредните модели на вештачка интелигенција и политичката борба за одговор ризикуваат примена на погрешно решение.
– Треба да поминеме повеќе време за да овозможиме правилата и стандардите што ги имаме да функционираат во голем обем, а помалку време фокусирајќи се на стравовите за теоретските ризици – рече Александру Воица, раководител на политиката во британската фирма за вештачка интелигенција „Синтезија“. Р.С.
