Кина освоила над 97 отсто од глобалниот пазар на хуманоидни роботи, значително надминувајќи ги своите американски конкуренти, се наведува во извештај објавен од американски „Блумберг“. „Агибот“, со седиште во Шангај, стана најголем производител, испорачувајќи околу 8.400 роботи за шест месеци и освојувајќи 44 отсто од глобалниот пазар. Оваа компанија ја надмина конкурентската „Јунитри роботикс“, со седиште во Хангжу, која испорача 5.900 роботи. Волуменот на двете кинески компании значително ги надминува испораките на водечките американски производители – „Тесла“, „Фајгур АИ“ и „Аџилити роботикс“.
Истовремено намената на роботите се менува. Иако индустриската и комерцијалната употреба сочинуваше околу половина од пратките пред една година, сега сочинува над 70 отсто. Иако бројот на хуманоидни роботи што всушност извршуваат економски корисна работа останува релативно мал, владината поддршка и финансирање во Кина го забрзуваат нивното усвојување.
„Блумберг“ забележува дека предноста на Кина е особено изразена со оглед на брзиот развој на индустријата. Тоа беше забележливо и на Светската конференција за вештачка интелигенција во Шангај, каде што десетици кинески производители претставија нови модели со подобрена брзина, агилност и функционалност.
Во првата половина годинава околу 19.100 хуманоидни роботи биле испорачани низ целиот свет, што е речиси четири пати повеќе отколку во истиот период минатата година. Се очекува испораките за целата тековна година да достигнат околу 60.000 единици, а до 2030 година дури 500.000.
Сепак, геополитичките ризици би можеле да го забават понатамошниот развој на пазарот. Кон крајот на јули, САД го забранија увозот на нови кинески хуманоидни и четириножни роботи, како и одредени компоненти, наведувајќи ги ризиците за националната безбедност и сајбер-безбедноста. Но кинеските компании за роботика и натаму привлекуваат рекордни инвестиции и не покажуваат знаци на забавување.
