Македонскиот младински фудбал продолжува да создава таленти кои го привлекуваат вниманието и на европските клубови. Еден од нив е Љеарт Алија, фудбалер од генерацијата 2012 на ФК Куманово Милано 2010, кој овие денови престојува во Австрија на десетдневен пробен период и тренинг-камп во редовите на еден од најтрофејните австриски клубови – Австрија Виена.
Младиот фудбалер, кој потекнува од селото Оризаре, Општина Липково, доби можност да тренира под надзор на стручниот штаб на австрискиот клуб и да ги покаже своите технички, тактички и физички квалитети стекнати во матичниот клуб.
Во текот на десетдневниот престој, Алија ќе помине низ серија тестирања за проценка на неговата физичка подготвеност, техничките способности и тактичката дисциплина. Покрај редовните тренинзи, ќе настапи и на повеќе контролни натпревари, каде ќе има можност да се докаже пред тренерите и скаутите на Австрија Виена.
Од ФК Куманово Милано 2010 велат дека ваквата покана претставува признание за квалитетната работа со младите категории и потврда дека клубот успешно создава играчи кои можат да се наметнат и на меѓународната сцена.
Од клубот, како и семејството на Љеарт, изразуваат уверување дека тој максимално ќе ја искористи оваа можност и ќе остави добар впечаток во Австрија Виена, достојно претставувајќи го својот клуб, Општина Липково и Македонија.
Без оглед на исходот од пробниот период, поканата од клуб со богата традиција како Австрија Виена претставува значаен чекор во развојот на кариерата на младиот фудбалер и дополнителен мотив за негов понатамошен напредок.
