Американскиот претседател Доналд Трамп изјави дека сака целосна промена на иранската владејачка структура и дека веќе има неколку имиња на ум за „добар лидер“ што ќе ја преземе земјата.
Коментарите на Трамп доаѓаат во услови на зголемени тензии и воени акции, а следеа по смртта на врховниот лидер на Иран, Хамнеи, минатиот викенд, објави Ен-би-си њуз. Во телефонско интервју Трамп беше директен. -Сакаме да влеземе и да исчистиме сè – рече тој.
-Сакаме тие да имаат добар лидер. Имаме неколку луѓе за кои мислам дека би направиле одлична работа – додаде тој, но одби да открие кои се тие.
Тој, исто така, потврди дека презема чекори за да се осигури дека луѓето на неговиот список ќе ја преживеат војната. -Да, ги набљудуваме – рече тој.
Трамп ја нарече „залуден коментар“ изјавата на иранскиот министер за надворешни работи, Абас Арагчи, кој рече дека неговата земја е подготвена за копнена инвазија од страна на американските и израелските сили. Трамп посочи дека не размислува за инвазија во моментов.
-Тоа е губење време. Тие изгубија сè. Ја изгубија морнарицата. Тие изгубија сè што може да изгубат – рече тој, најавувајќи продолжување на нападот со исто темпо и интензитет.
Постојат шпекулации дека може да го наследи неговиот син, Моџтаба Хамнеи. Аналитичарите исто така веруваат дека Корпусот на исламската револуционерна гарда, доминантната воена, политичка и економска сила во земјата, е подготвен да го прошири своето влијание ако го преживее сегашниот конфликт.
