Италијанците Матео Фурлан и Федерико Тамборино и Матијас Диас Хернандес од Аргентина во машка, како и Аргентинката Мајте Ајлен Пука во женска конкуренција се прогласени за победници на 38-миот Охридски пливачки маратон што денеска се одржа во водите на Охридското Езеро.
Лошите временски услови проследени со силен ветар и бранови ги спречи учесниците да стигнат до целта,= на градското пристаниште. По четири и пол часа пливање трката беше прекината во 14 часот и 30 минути од безбедносни причини.
– Во тој момент во машка конкуренција израмнети на првото место беа Италијанците Матео Фурлан и Федерико Тамборино и Аргентинецот Матијас Диас Хернандес. Согласно пропозициите тројцата се прогласени за победници на маратонот – стои на официјалната фејсбук-страница на Охридски пливачки маратон.
Четврто пласиран е Марко Инглима од Италија, петти е Петар Цеков од Македонија, шестото место му припадна на Хуго Риберо од Португалија, седмото на Македонецот Александар Илиевски, осмопласиран е Акилјес Балудо од Аргентина и деветти Леонид Мишевски – Македонија. Македонскиот маратонец Лазар Поп Трајков се откажал од трката во рана фаза.
Во женска конкуренција второпласирана е Аргентинката Ерика Јенсен, а трета Милица Љубисављевиќ од Србија. Четврта завршила нашата Росана Гошева пред Елена Лоенело од Италија и Алисја Гедриш – Полска.
