Етничките партии се „капут медузе“, најголемата несреќа и идиотизам на новата Македонија. Бивши истакнати политичари на Југославија, вклучувајќи ги и Владимир Дедијер и Милован Ѓилас, предвидуваа дека етничките партии ќе бидат огромна трагедија, особено во Босна и во Македонија. Зошто други држави немаат етнички партии? Затоа што не се глупаци како нашите примордијални политичари. Зарем таму не живеат разни етникуми? Етничките партии се ДНК на раздорот за кој и тоа како се заинтересирани странските служби. Зарем Али Ахмети не му се колнеше на Еди Рама дека ќе работи на „голема Албанија“?
Една мала дигресија на почетокот. Дали ја видовте онаа слика со европските премиери наредени како во забарска чекалница (добре де, била генерирана, но ни оригиналната не беше нешто поразлична)? Чекаат на ред да му ја испеат на другарот Трамп титоистичката песничка „друже Трамп, ми ти се удебелоцревуемо“. Европа ќе му баци раце на Трамп, а ќе им баци нозе и на џихадистите. Сиротите аналитичари се трудат да развијат „суверенистичка“ теорија на капитализмот. Не ми е јасно каков е тој демек „суверенизам“ кога мора да ги соблечеш пантолоните и сѐ друго? Сосема сум сигурен – запомнете ми го зборот – утре ќе се соблекуваат пред Бугарија! Веќе еднаш се соблекоа во Европската комисија визави македонскиот идентитет и јазик. Око не им трепна. А ние немаме проблем, ние се соблекуваме на сите страни, ете најдобро сме го сфатиле капитализмот.
Е па, драги мои, бидејќи длабоко ги сфативме „суверенизмот“ и капитализмот, сега сме најсилни да настапиме на избори – слободни и демократски, разбира се. Ги прашувам моиве другари безбедњаци дали на изборите ќе се мешаат надворешните служби. „Добро бе, ти си наш другар над 50 години, нели научи дека службите секогаш се мешаат и секогаш одлучуваат“! „Добро де, добро, си реков сега сме суверенисти, па сме се откачиле од службите.“ Размислувањата започнаа по интервјуто на Канал 5 со госпоѓата Кристина Костова, потпретседателка на СДСМ. Ме изненади офанзивноста со рафално зборување, потсетувајќи ме на некоја легендарна хероина, како на пример Томирис, Будика или Јованка Орлеанка со фамозната глумица што ја одигра – Мила Јововиќ… Од каде таа експлозивност, атомска енергија? Значи СДСМ станува многу силна партија, т.е. има некоја грбачина, бидејќи самата е во статус нула (или така се чини). На пример грбачината Бугарија. Дали бугарските служби нема да се мешаат во изборите? Што? Нема да се мешаат? Тие се влезени во вашите мозоци, вашите предрасуди, суеверија, во вашите фамилии, емоции од секаков тип – пикнати се! За време на фамозниот или инфамозниот Љупчо Георгиевски, кој се смета поголем Бугарин од царот Борис Трети и Тодор Живков заедно, велеше дека Македонија ќе ја анектира во Бугарија, заедно со неговата свита подлизурковци. А тие живи ли се? Постојат ли? Да не испариле случајно? Да не се лажеме, оваа хипербугарофилија ја знам од лични контакти. Сменети се под интервенција на американските служби, кои не им е ќеф да имаат „голема Бугарија“ под носот. Потоа дојде еден уште поголем бугароподлизурковец – Заев (Господ да го казни). Уште се тазе неговите бугароупикувања и бугаропродавања, па не морам да елаборирам.
Е па, сега – Бугарија и бугарските служби на следните избори за кого ќе се залагаат? Немој само да кажете дека ќе седат мирни и ќе посматраат. Значи, зајковци ги имаат Бугарија и службите како адут. Слаб адут? Ма немојте! За време на Тодор Живков бугарските служби беа најсилни во Европа, а и сега се силни. Тоа го докажаа со лобирањето во Европскиот совет, каде што ѝ ги свртеа мозоците на цела Европа против нас. Уште поголема трагедија беше првата македонско–бугарска историска комисија, со акад. Драги Ѓоргиев на чело. Дали поткупена или обработена, таа ги прифати сите тези на Бугарите, вклучувајќи и дека царот Борис Трети, Богдан Филов и Георги Белев не биле фашисти, туку администратори. И тоа влегува во историските учебници. Мене цела фамилија ми е убиена од овие ѕверови и ме убедуваат дека не биле фашисти. Дури и во наши и меѓународни еврејски организации се упикуваат за да ги шират лагите. Срам за сите нас. Моите родители буквално беа понижени. Подоцна истите тие решиле дека царот Самоил не бил Македонец туку Бугарин, па исто дека Климент Охридски не бил Македонец, туку Бугарин, па исто и за Наум, Партенија Зографски, Питу Гули, Никола Карев и Гоце Делчев. Најсетне се дозна дека и Охридската архиепископија ја прогласиле за бугарска, со што ѝ плукнаа во лице на македонската историја. Јас се побунив во некои медиуми и бев персона нон грата некое време. Кога дојде новата комисија, работата со Охридската архиепископија и холокаустот се нормализираа со многу маки. Мене цела фамилија ми е убиена под наредба на царот Борис Трети и нацистичкиот систем на Бугарија, а вие барате да им бацам рака! А Грција? Мислите ќе седат мирни? Цела историја ја кршеше и палеше Македонија, па сега ќе бидат бубачиња? И кого ќе поддржат? Па Зајко, се разбира. Милијарди се на располагање. Знаете од каде? Па, наши пари. Над милион и двесте илјади излези се регистрирани лани (сега многу повеќе), што значи 2 милијарди евра им ставаме во џепче за да нѐ плукаат директно во лице. Ако ние им даваме на Грците 2 милијарди годишно на „гладно срце“, тогаш ние сме грчки робови. Енде. Значи, со овие 2 милијарди тие може да ги купат сите „патриоти“ што „не можат да живеат и да дишат“ без грчкото море. Така ќе ги купат и гласовите. Е, па, со ваква „грбачина“ нашата Мила Јововиќ може да урла и да плука по сите нас како голтари и губавци. Така, во оваа игра Заев е Елена Тројанска, Парис е Ципрас, Радев е Агамемнон, а Македонија е напумпана со тројански коњи. Мицкоски се обидува да биде Одисеј, но ќе видиме подоцна. Етничките партии се „капут медузе“, најголемата несреќа и идиотизам на новата Македонија. Бивши истакнати политичари на Југославија, вклучувајќи ги и Владимир Дедијер и Милован Ѓилас, предвидуваа дека етничките партии ќе бидат огромна трагедија, особено во Босна и во Македонија.
Зошто други држави немаат етнички партии? Затоа што не се глупаци како нашите примордијални политичари. Зарем таму не живеат разни етникуми? Етничките партии се ДНК на раздорот за кој и тоа како се заинтересирани странските служби. Зарем Али Ахмети не му се колнеше на Еди Рама дека ќе работи на „голема Албанија“? Зарем серија инциденти на Влен не покажаа за кого и за што работат? Ајде не бидете ноеви – не брцајте глави во песокот! Тоа ти се 25-30 отсто од гласовите, драги читатели. Пред 30 години кој потпиша цирка 200.000 паспорти на Косовари? Одговара некој? Бог да чува. А парите? Од извесни солидни извори дознавам дека пари доаѓаат од Саудиска Арабија и Иран, преку Турција, а и од недозволени трговии (кокаин, луѓе, оружје) за албанските етнички партии. Другите етникуми не се толку маркантни. Турците ќе одат со муслиманите, исто и Ромите (оставени на себе да се грижат). Но на крајот може да победи факторот прагматизам. Власите се инклинирани кон СДС. Според оние што ги познавам, може малку да бидам дрзок дека тие може да го извадат СДС од мртвите. Но како што рековме, тука се Бугарија и Грција и нивните служби. А тие апсолутно можат да ги активираат и службите на ЕУ.
Најсетне дојде „нашиот јунак“ ВМРО-ДПМНЕ. Така велам оти сите знаат дека тој е главниот фаворит. Него ќе го поддржат службите на Унгарија, Обединетото Кралство, Германија и САД. Да ни биде јасно, таму каде што ќе покаже прстот на Стејт департментот – тој е победникот. Тоа знаеме дека е така и не вреди да дискутираме. Другите европски служби не се специјално заинтересирани, преферираат „свиткани кичми“, а секако тие ќе бидат под влијание на бугарските. Бившите југословенски земји и служби покажуваат склоност кон владејачката групација, но има и други што се под влијание на исламизмот. За тоа најмногу сме виновни ние самите. Пред триесетина години министерот Фрчковски ја разнесе разузнавачката служба, која некогаш беше прва во Југославија. По тоа таа е кадровска прчварија, како впрочем растур на сите фабрики, кадровски подвали во здравството, универзитетите, атрофија на земјоделството, депресија во секојдневниот живот итн.
Верските заедници имаат огромно значење, иако официјално велат дека не се мешаат во политиката. Меѓуверските односи, барем меѓу институциите, се примерни. Православната црква е столбот на македонизмот и од историски аспект и во актуелниот живот. Има одговорност за опстанок на Македонија. Има и огромен успех и на меѓународно ниво во однос на признавањето, а и повраток на историската Охридска архиепископија, иако со многу маки и голготи што уште претстојат. Во однос на гласачката машина, постои различност и така треба да биде. Исламската верска заедница (ИВЗ) е јасно концентрирана кон етничките заедници и партии, претежно кон албанските. Хронично се жалат на големи притисоци од партиите, а така ќе биде и сега. Католичката црква може да има умерено влијание поради бројот на верниците, но, од друга страна, со голема подршка и силина на Ватикан, кој знаеме какво влијание има во светот. Протестантските цркви се од огромна важност поради нивните силни поврзаности со Америка, Британија, Ерусалим итн. Бидејќи се врзани за социјалните слоеви, досега имаа инклинации кон левите партии, но сега има и шифт поради разочарувања во социјалата. Инаку, ситните партии немаат никакво значение, освен негде да дотураат бензин во огнот, малку карневализам, карикатуризам и ароматизам на мочуриштето.
Следува период на сурова пропаганда, брутални обвинувања, навреди, предизборен садомазохизам, лаги, шовинизми, брутални игри, примитивизам, гладијаторство и уситнување на моралот. За фотелја, и дете ќе си продадат. Искрено им советувам на оние со кардиоваскуларни, системски и психијатриски болести – да се тргнат од телевизорите и медиумите кога ќе има политички пропаганди.
Проф. д-р Самуел Садикарио Колономос
