Состојбата на повредените пациенти од пожарот во клубот „Пулс“ во Кочани сместени во ГОБ „8 Септември“ во Скопје е стабилна однос на виталните параметри. Заедно со тимовите од специјализираните центри од странство се изведуваат операции за отстранување на изумреното ткиво оштетено од изгорениците и давање простор тие рани полека да почнат да зацелуваат, информира директорот на ГОБ „8 Септември“ Синиша Стојановски.
На денешната прес-конференција во Владата посочи дека утрово хируршки се третирани 15 пациенти, а се планира во текот на денов да се изврши таква интервенција кај уште тројца пациенти.
– Во овие неколку денови не само што се мониторираше потенцијалното влошување на пациентите, мораа и да се санираат и повредите на оние пациенти кои не беа критични во прва фаза, ниту беа во живото загрозувачка состојба. Процесите на тријажа и мониторирање на пациентите и прераспределба согласно на тежината на нивната клиничка слика одеа паралелно. Мора во континуитет и да се прави преврска на раните и да се гледа она ткиво кое е изумрено да се отстранува за да се даде простор раната полека да почне да заздравува. Токму во таа насока се и оперативните интервенции – рече Стојановски.
Интервенциите, како што кажа, се прават како резултат на екстензитетот, односно големината на процентот на телото кој што е зафатен со изгореници, а не затоа што се во живото загрозувачка состојба.
