Претседателот на САД и претседателот на Русија во подготовки за одржување на својот втор разговор
Американскиот претседател Доналд Трамп и рускиот претседател Владимир Путин, според западните медиуми, треба да остварат телефонски контакт најверојатно денеска. Тоа за медиумите го изјави специјалниот претставник на Трамп за Блискиот Исток, Стив Виткоф. Тој минатата недела беше во Москва, разговараше со високи руски функционери и на крајот лично со Путин, при што беше договорен разговорот на највисоко ниво што најверојатно ќе се одржи денеска. Тоа ќе биде втор телефонски разговор меѓу двајцата лидери откако Трамп го започна својот втор мандат на 20 јануари.
Првиот разговор меѓу Трамп и Путин беше во февруари годинава
Трамп и Путин разговараа во февруари и се договорија да започнат и да продолжат со разговори на високо ниво за ставање крај на војната во Украина.
– Мислам дека двајцата претседатели ќе имаат навистина добра и позитивна дебата неделава. Навистина се надевам дека ќе видиме вистински напредок овде и очекувам овонеделниот повик да биде многу позитивен и конструктивен – изјави Виткоф.
Првиот повик на Трамп до Путин следуваше откако Виткоф отпатува во Русија за да го донесе дома Марк Фогел, американски наставник по историја за кого САД сметаа дека е неправедно притворен.
– Мислам дека е многу позитивен знак тоа што тие двајца ќе разговараат во одреден момент. Мислам дека тоа покажува дека има позитивен моментум – додаде Виткоф.
Виткоф: И Трамп и Путин го критикуваат Макрон
Виткоф официјално ја отфрли неодамнешната оцена на францускиот претседател Емануел Макрон, кој во изјавата истакна дека Русија „изгледа дека не сака искрено мир“ и дека Путин ги интензивирал борбите пред преговорите.
– Жално е луѓето да прават такви процени кога немаат знаење од прва рака – истакна Виткоф во врска со Макрон.
– Знам што слушнав, бев сведок на говорот на телото. Видов конструктивен напор, во долг временски период, да разговарам за спецификите на она што се случува на теренот – рече Виткоф за неговата средба со Путин. Р.С.
Средба на американскиот државен секретар Рубио и рускиот министер за надворешни работи Лавров
Утврдување на „следните чекори“
Американскиот државен секретар Марко Рубио и рускиот министер за надворешни работи Сергеј Лавров завчера исто така разговараа за постигнување на заеднички посакуваната цел – прекин на огнот во Украина.
Двајцата високи функционери на САД и на Русија разговараа за „следните чекори по неодамнешните состаноци во Саудиска Арабија и се согласија да продолжат да работат на обновување на комуникацијата меѓу Соединетите Американски Држави и Русија“, се наведува во официјалното соопштение од Вашингтон.
Во официјалното соопштение од Москва, пак, се наведува дека „договорот меѓу САД и Украина дојде за време на состанокот во Џеда, Саудиска Арабија, откако администрацијата на Трамп исто така одржа разговори со руските власти на истата локација во февруари“. Рубио и Лавров во заемниот конструктивен дијалог „дискутираа и за конкретни аспекти од спроведувањето на меѓусебното разбирање постигнато на состанокот на високи руски и американски претставници во Ријад на 18 февруари“, се истакнува во руското официјално соопштение.
Минатата недела Украина и САД се согласија за предлогот за итен прекин на огнот. Путин потврди дека „во принцип е за мир“, но дека за „долгорочни решенија“ изрази претпазливост. Во тој контекст помошникот на Путин дополнително го прошири овој став, изјавувајќи дека „овие 30 дена би биле корисни за закрепнување на Украина“ бидејќи руската армија моментално напредува на неколку фронта.
Рубио го информира Лавров и за американските напади врз повеќе цели во Јемен контролирани од екстремистите Хути. Како одговор, рускиот министер повика на „политички дијалог за да се најде решение што ќе спречи понатамошно крвопролевање“. Р.С.
По воведувањето на царините, САД ќе се обидат да преговараат за нови билатерални трговски договори
Рубио: САД ќе ја рестартираат основната трговска линија
Откако САД воведоа царини за некои од државите со кои имаат значителна трговска размена, Вашингтон размислува за билатерални преговори со тие земји, за нови трговски аранжмани. Таква најава во јавноста испрати државниот секретар Марко Рубио. Тој исто така изјави дека САД ќе возвратат на државите што воведоа царини кон Америка.
– Ова е глобално. Ова не е против Канада, не е против Мексико, не е против ЕУ… Од таа нова основа на правичност и реципроцитет, ќе се вклучиме – потенцијално – во билатерални преговори со земјите низ светот за нови трговски аранжмани што имаат смисла за двете страни – изјави Рубио.
Тој за јавноста не ги опиша деталите за тоа како би можеле да изгледаат новите договори, но секако нагласи дека САД ќе ја „ресетираат основната линија“ за Вашингтон да се осигури дека „новите трговски договори ќе бидат третирани фер“
– Не ни се допаѓа статус кво. Ќе поставиме нови релации, а потоа ќе можеме да преговараме за нешто, доколку тие (другите земји) сакаат. Ова што го имаме сега не може да продолжи – беше дециден Рубио. Р.С.
Германските конзервативци постигнаа начелен „клучен договор за одбраната и инфраструктурата“, а лидерот Фридрих Мерц изјави дека „Германија се врати“! Додека Европа се бори со „пресвртот на трансатлантската алијанса“, плановите на Мерц, за кои има голема веројатност дека ќе бидат изгласани во Бундестагот денеска, претставуваат радикално заминување од земја што традиционално не сака да преземе големи суми долгови или да троши многу на војската со оглед на ужасите од нејзиното нацистичко минато. Последново е напис во реномираниот медиум АФП
Денеска клучно гласање во германскиот Бундестаг
Дали Мерц собра двотретинско мнозинство за исчекор на Германија во вистинска насока?
По неколкудневни преговори, партијата ЦДУ на Мерц и централнолевичарската СПД, кои ги предложија реформите и преговараат за формирање коалиција, постигнаа договор со зелените, чии гласови се потребни за предлозите брзо да поминат низ актуелниот законодавен дом. Мерц им рече на новинарите дека договорот „е јасна порака до партнерите и пријателите, но и до непријателите на нашата слобода: ние сме во состојба да се браниме“.
– Германија се врати – додаде тој, признавајќи колку внимателно се следи процесот во Брисел и другите европски престолнини, кои беа очајни најголемата економија во регионот да покаже поголемо лидерство.
Петстотини милијарди евра за инфраструктурни трошоци
Плановите вклучуваат изземање на трошоците за одбрана од уставно утврдената „сопирачка на долгот“, која го ограничува задолжувањето, а исто така и формирање посебен фонд од 500 милијарди евра за инфраструктурни трошоци. „Кочницата за долг“ беше запишана во германскиот устав во 2009 година како одговор на глобалната финансиска криза. Инвестициите во инфраструктурата, за внесување нов живот во областите како што се „дотраената железничка мрежа на Германија и распаднатите мостови“, како што пишува АФП, се сметаат за клучен начин да се извлече економијата од стагнација и да се избегне трета година по ред на рецесија. Потребни се гласовите на зелените за да се постигне двотретинското мнозинство во парламентот, кое е потребно за измена на должничката кочница, но партијата се закани дека ќе ја откаже поддршката, наведувајќи ги недоволните еколошки мерки во планот за трошење.
Отстапка од инфраструктурниот фонд во висина од сто Милијарди евра за – климата
Мерц, чии конзервативци беа први на изборите во февруари, направи клучна отстапка со договор дека сто милијарди евра од инфраструктурниот фонд ќе бидат наменети за мерки за заштита на климата. Зелените рекоа дека дополнителните пари за мерките за заштита на климата „ќе направат разлика“, а целиот договор е важен со оглед на превирањата предизвикани од промените во политиката на Трамп.
– Не можеме да го негираме фактот дека треба подобро да ја опремиме нашата војска, дека треба да направиме повеќе за целокупната безбедносна архитектура на нашата земја – рече партиската колидерка во парламентот Брита Хаселман.
Според ревидираните планови, овластувањето за прекумерно трошење на одбрана ќе се однесува и на трошоците за разузнавачки служби и за помош на „земјите што страдаат од незаконска агресија“. Фондот за инфраструктура претставува особена победа за СПД, која под канцеларот во заминување Олаф Шолц долго време се залагаше за дополнителни инвестиции. Расправиите за тоа како да се финансира и до каде да се реформира должничката кочница беа клучни за поттикнување на колапсот на неумешната трипартиска коалиција на Шолц во ноември.
– Ако реформата (сопирачката за долгот) помине во вторник (денеска, н.з.), тоа ќе биде ослободувачки момент за Германија – рече парламентарниот лидер на СПД, Ларс Клингбејл. Р.С.
