Иновативното истражување има цел да направи совршени терени за клупското СП годинава и за СП за репрезентации в година во САД. „Целиот свет ќе има корист“, вели Инфантино, кој ја предводеше делегацијата на ФИФА во посета на објектот за развој на трева и истражување, во Ноксвил (Тенеси, САД)
Претседателот на Светската фудбалска федерација (ФИФА), Џани Инфантино, ја пофали револуционерната работа за подготовка на најдобри можни терени за клупското Светско првенство (СП) годинава и за Светското првенство за репрезентации в година во САД, при посетата на иновативниот објект за развој на трева и истражување во Ноксвил (Тенеси, САД). Кога градовите домаќини и стадионите за СП 2026 беа објавени во јуни 2022 година, тимот за управување со терени на ФИФА спроведе петгодишен проект за истражување и развој за да создаде совршени тревни површини за турнирот и конзистентност за играчите без оглед на климата или типот на стадионот на кој ќе настапуваат, пишува ФИФА. Тоа партнерство со Универзитетот во Тенеси и со Државниот универзитет во Мичиген оттогаш е проширено за да го вклучи најголемото клупско СП, а Инфантино беше импресиониран од прогресивната употреба на технологијата што може да биде од корист и за благосостојбата на играчите и за спектаклот со 167 меча на два глобални турнира.
– Квалитетот на терените е важен за овие две фантастични натпреварувања во градовите, кои имаат различни услови, некои се на ниво на морето, некои се на надморска височина, некои се покриени, така што сакаме да се увериме дека квалитетот на терените е ист за сите тимови и за сите играчи во сите градови. Квалитетот на подлогата, тревата, отсекогаш бил од огромно значење за мене. Со нашиот внатрешен тим во ФИФА отсекогаш истражувавме начини да ги направиме работите подобро, особено кога имате турнир што трае еден месец или еден и пол месец и се игра во различни градови. Нашиот тим истражуваше и ги најде најдобрите луѓе во светот да ни помогнат и фер е да се каже дека со Алан Фергусон, висок менаџер за управување со терени на ФИФА, ја имавме оваа визија и ги здруживме силите да направиме нешто каде што фокусот е Светското првенство и Светското клупско првенство, но од што ќе има корист целиот свет – изјави Инфантино, пренесе ФИФА.
Инфантино ја пофали работата на домаќините на Универзитетот во Тенеси, предводени од водечкиот во индустријата д-р Џон Сорочан.
– Фокусот е на конзистентноста и на униформноста. За 104 натпревари, на 16 стадиони и со пет затворени стадиони, на различни надморски височини, различни земји, два различни типа на треви и да се обидеме да ги направиме исти. Така, кога фудбалерот трча, ако игра во Мајами, и оди во Мексико Сити, во Ванкувер, да не чувствува дека е поинаку под неговите нозе, а кога топката ќе удри во површината и ќе дојде до него, тоа да биде исто. Тоа е мојата визија и цел од почетокот. ФИФА беше неверојатна за инвестирањето во истражување и разгледувањето податоци засновани на докази за да се добие најквалитетниот можен терен – рече Сорочан, пренесе ФИФА. Н.М.
