Израелската војска (ИДФ) и израелската безбедносна агенција Шин Бет денеска во заедничко соопштение соопштија дека двајца високи команданти на Хамас се убиени во израелските воздушни напади во Либан.
Првиот напад, извршен во текот на ноќта врз бегалскиот камп Бедави, во близина на градот Триполи на северот на Либан, беше насочен кон ликвидација на Саид Аталах Али, пренесува „Тајмс оф Израел“. Во официјалното соопштение на ИДФ и Шин Бет се наведува дека Али организирал терористички напади против Израел и работел на регрутирање нови членови на Хамас во Либан.
Вториот израелски напад, кој се случи утрово во близина на градот Саднајел во долината Бека, беше насочен кон Мохамед Хусеин ал-Лавис, кој исто така е ликвидиран. Според соопштението на ИДФ и Шин Бет, Ал-Лавис бил претставник на „извршната власт на Хамас во Либан“ и наводно ги координирал терористичките напади на Западниот Брег.
Палестинската вооружена група Хамас, пак, денеска ја потврди смртта на Саид Аталах Али.
Либанската новинска агенција ННА објави дека сопругата и двете деца на Али исто така загинале во нападот.
Претходно, либански безбедносни извори информираа дека беспилотно летало погодило стан во палестински бегалски камп во близина на Триполи.
