Вчерашниот ирански ракетен напад врз Израел наиде на општа осуда во меѓународната заедница, а нападот, како херојски, беше поздравен само од палестинскиот исламистички Хамас и од Хутите во Јемен.
Генералниот секретар на ОН, Антонио Гутереш го осуди ширењето на конфликтот на Блискиот Исток и рече дека тоа мора да престане и дека е потребен прекин на огнот.
-Европската унија најостро го осудува иранскиот напад – изјави шефот на дипломатијата на ЕУ.
-Опасниот циклус напади и контранапади ризикува да излезе од контрола. Потребен е прекин на огнот во целиот регион – напиша високиот претставник на ЕУ за надворешна политика и безбедност, Жозеп Борел на „Х“.
Американскиот државен секретар, Ентони Блинкен го оцени нападот како „целосно неприфатлив“ и додаде дека „целиот свет треба да го осуди“. Тој рече дека Иран истрелал околу 200 балистички ракети и дека првите извештаи покажуваат оти нападот не успеал, со активна помош на САД и другите партнери.
– Американската потпретседателка и демократски кандидат за претстојните претседателски избори, Камала Харис – изјави дека Иран е „опасна“ и „дестабилизирачка“ сила на Блискиот Исток и дека Вашингтон е посветен на безбедноста на Израел.
-Јасна сум дека Иран е дестабилизирачка, опасна сила на Блискиот Исток – рече Харис.
Таа нагласи дека „ќе се погрижи Израел секогаш да има способност да се брани од Иран и терористичките милиции поддржани од Иран“.
Берлин го повика Иран да престане да стрела ракети и изрази страв од ескалација на конфликтот.
-Најостро го осудувам нападот – напиша германската министерка за надворешни работи, Аналена Бербок и го повика Иран веднаш да го запре нападот, кој „го приближува регионот до бездната“.
Германскиот канцелар Олаф Шолц ги повикува Иран и Хезболах веднаш да ги прекинат нападите врз Израел и предупреди дека Иран ризикува да го запали целиот регион.
Германија и нејзините партнери ќе продолжат да работат на прекин на огнот – додава тој.
-Иран ризикува да го запали целиот регион – тоа мора да се спречи по секоја цена. Хезболах и Иран мора веднаш да престанат со нападите врз Израел – рече тој.
Шпанскиот премиер, Педро Санчез го осуди лансирањето на ракетата од Иран и повика на прекин на „спиралата на насилство“ во регионот.
Русија рече дека експлозивната ситуација на Блискиот исток го покажува „тоталниот неуспех“ на американската политика во регионот и „немоќта“ на Вашингтон да спречи ескалација.
Францускиот премиер, Мишел Барние беше загрижен за ескалацијата на Блискиот исток и за директниот конфликт меѓу Иран и Израел и оцени дека ситуацијата е „исклучително сериозна“.
Британскиот премиер, Кир Стармер го осуди иранскиот напад и ја повтори силната посветеност на Велика Британија за безбедноста во Израел.
Тој ја истакна важноста на прекинот на огнот во Либан, каде Израел изведува напади против Хезболах, и повторно повика на прекин на огнот во Газа и враќање на израелските заложници.
Палестинското исламистичко движење Хамас го поздрави иранскиот напад и рече дека тоа е одмазда по израелското убиство на лидерот на Хамас, Исмаил Ханија и лидерот на либанскиот Хезболах, Хасан Насралах.
И милицијата на Хутите во Јемен, поддржана од Иран, го пофали Техеран за истрелувањето балистички ракети кон Израел, тврдејќи дека операцијата погодила израелски воени цели.
