Во првата половина од годината, природните катастрофи предизвикале значително поголема штета од долгорочниот просек, објави швајцарскиот реосигурител „Свис ре“, нагласувајќи ги грмежите во САД и зголемениот ризик од град. Осигурената штета изнесува 60 милијарди долари во периодот од јануари до јуни, пресметаа тие, нагласувајќи дека сумата е за 62 отсто поголема од десетгодишниот просек. Особено голема штета предизвикале силните бури со грмежи, често придружени со силен ветер, па дури и торнада. Осигурената сума е речиси двојно поголема од минатата година.
Штета од 120 милијарди долари
Дури 70 отсто од осигурената сума отпаѓа на штетата предизвикана од грмежи, особено во САД. Тоа не значи дека тука бурите биле посилни отколку во другите делови на светот, туку дека куќите и инфраструктурата во поголема мера се покриени со осигурување, нагласува „Свис ре“.
Треба да се додаде дека недвижностите во САД често се поскапи отколку во остатокот од светот и дека трошоците за изградба нагло се зголемија поради инфлацијата, додаваат тие. Осигурените имоти исто така се значително поранливи на штети од град, предупредуваат тие, препорачувајќи поголеми инвестиции во заштита од поплави и построги правила за градба за подобра заштита на домовите.
Процената на осигурената загуба објавена од „Свис ре“ се совпаѓа со онаа на германски „Минхен ре“, според извештајот објавен кон крајот на јули.
Поплавите, бурите и другите природни катастрофи однесоа 4.500 човечки животи во првата половина од годината и предизвикаа штета од 120 милијарди долари, покажуваат пресметките на германската осигурителна куќа.
Најголема штета предизвикал земјотресот во Јапонија
Сумата е поголема од просечната пред десет и триесет години, но е помала од првата половина од минатата година, кога штетата надмина 140 милијарди долари, а осигурувањето покрило околу 60 милијарди долари. Разорните земјотреси во Турција и во Сирија во февруари 2023 година однеле повеќе од 50 илјади човечки животи, но само мал број луѓе и компании во погодените области биле осигурени од природни катастрофи.
Во првата половина од оваа година, најголема штета предизвикал земјотресот во Јапонија на Нова година, во износ од околу десет милијарди долари, објави „Минхен ре“.
– Во изминатите десет години, економските загуби во просек изнесуваа нешто помалку од 90 милијарди долари. Осигурените загуби уште појасно го опишуваат трендот бидејќи во првата половина од оваа година изнесуваа 62 милијарди долари, во споредба со десетгодишниот просек од 37 милијарди долари – изјави климатологот Ернст Рауч.
