Техно
Познатиот аналитичар Минг-Чи Куо неодамна предупреди дека „Епл“ очекува значителен пад на побарувачката за нивните паметни телефони оваа година. Постојат неколку причини за ова. Една од тие причини е повторното заживување на Хуавеи во Кина, а другата е поврзана со најголемиот конкурент на „Епл“ на пазарот на паметни телефони – јужнокорејскиот „Самсунг“.
Имено, најновите топ-модели на оваа компанија имплементирале вештачка интелигенција, а компанијата веќе со години развива и продава телефони со флексибилни екрани. Во двете од овие полиња, „Епл“ заостанува и аналитичарите веруваат дека тоа ќе влијае на нивната продажба на краток рок.
Сепак, Кук е свесен дека не може долго да ги игнорира овие пазарни трендови, а во иднина очекуваме вештачка интелигенција на „Епл“, како и уреди со флексибилни екрани. Компанијата, како и речиси сите технолошки компании на пазарот, го забрза развојот на вештачката интелигенција, а во втората половина од годината очекуваме дека Епл АИ ќе биде достапна за корисниците на ајфон, но не е познато дали сите сопственици на ајфон ќе можат да ја користат со претстојната верзија на мобилниот оперативен систем (иОС 18) или, сепак, ќе има одредени ограничувања за моделите што ќе можат да ги користат сите нивни опции.
Според информациите од „извори поврзани со индустријата“ од Јужна Кореја, „Епл“ би можел да ги реализира своите планови за уред со флексибилен екран за две-три години. Како што беше кажано претходно, тоа не би требало да биде телефон, туку таблет, пишува „Зимо“.
„Самсунг дисплеј“ и „ЛГ дисплеј“, според информациите на аналитичарите, веќе ѝ дале примероци на „Епл“ од нивните флексибилни екрани од 6 и од 7 инчи, но се чини дека „Епл“ сѐ уште размислува за поголеми уреди. Така, компанијата би можела да претстави таблет со флексибилен екран во 2026 година или дури во 2027 година, кој би требало да го замени ајпад-мини. Се споменува дијагонала на екранот од седум до осум инчи, но конечните спецификации наводно сè уште не се финализирани, па дотогаш уште многу може да се сменат. Којзнае, можеби паметните телефони со екрани што се виткаат ќе станат толку популарни дотогаш што „Епл“ ќе ја промени својата стратегија и ќе се одлучи за виткачки ајфон.
