За многумина денот е незамислив без шолја кафе, особено омиленото утринско кафе, кое претставува вистински почеток на денот. Но со оглед на тоа што често следува друго, а потоа трето, се поставува прашањето колку кафе е премногу.
Кофеинот, супстанција од семејството алкалоиди што се наоѓаат во кафето, е еден од најстарите стимуланси за човечката популација. Кога се разгледува прашањето колку шолји кафе можеме да испиеме во текот на денот, вниманието првенствено се насочува кон влијанието на кофеинот врз крвниот притисок и отчукувањата на срцето поради неговото влијание врз срцето и циркулацијата.
– Ако сте здрави, обично е прифатливо да пиете четири или пет шолји кафе дневно распоредени во текот на денот, но важно е да се напомене дека секој има различна толеранција кон кофеинот. Кафето може да влијае на крвниот притисок; мало зголемување на крвниот притисок за 10-20 ммхг кратко време по пиење шолја кафе е нормално. Кај лицата што редовно консумираат кафе, овој ефект на зголемување на крвниот притисок исчезнува по околу две недели. Дури и луѓето со висок крвен притисок можат да консумираат кафе – вели д-р Кристијан Енгелберт.
Освен тоа, дури три опсежни студии докажале дека кај здравите луѓе кафето влијае позитивно на работата на срцето.
Сепак, докторот посочува дека треба да го намалите количеството доколку забележите некој од следните симптоми: срцева аритмија, потење, главоболка, стомачна болка, немир и тахикардија.
– До 200 милиграми кофеин во една доза не предизвикува здравствени проблеми. Генерално, доколку сте во добра здравствена состојба, толерираната дневна доза на кофеин е 300-400 милиграми – вели д-р Енгелберт.
Тој советува и дека е добро да се испие чаша вода по кафето, бидејќи го омекнува неговото влијание врз желудникот и ја одржува хидратацијата.
Кога станува збор за одговорот на прашањето колку шолји кафе дневно се премногу, клучот е да го следите сопственото тело. Ако забележите некој од несаканите симптоми, како што се забрзано чукање на срцето, дигестивни проблеми или чувство на немир, размислете за намалување на дневната доза на кофеин.
Но ако моменталното количество на кафе што го консумирате на дневна основа не ви предизвикува никакви тешкотии, а особено ако јадете и урамнотежена исхрана и редовно вежбате, Енгелберт тврди дека нема причина да се грижите или да се откажете од омилениот пијалак.
